雙翼蝴蝶酥 (抹茶及阿華田味)

蝴蝶酥是經典既法式甜點，一般既造型，原味及朱古力味，以前經常做來送俾親友，佢香甜酥脆，好受歡迎，用來做小食，配一杯熱茶或咖啡都不錯，我今次造型改了做雙翼款式，用了抹茶味及阿華田味兩款，同樣咁好味，不妨一試啊！

材料 : 兩味各一塊酥皮

急凍即用酥皮 2 塊 (室溫放軟)

砂糖約 7 - 8 湯匙  (或赤砂糖)

牛油適量 (室溫放軟)

抹茶粉約 1 茶匙

阿華田粉約 1 茶匙

做法:

1. 準備一塊酥皮，放出來等變軟點後，輕輕掃上牛油，用篩平均在表面灑下砂糖，再灑上抹茶粉，再輕按壓一吓。

2. 兩邊向內摺，一邊摺多點，一邊摺少點，不用太大力壓，輕輕摺便可再向內摺，留意中間要留有少許空隙位對摺。

3. 另一塊酥皮，同樣輕輕掃點牛油，用篩平均在表面灑下砂糖，灑上阿華田粉，再輕按壓一吓。

4. 摺好，放入雪櫃普通格雪約 25-30 分鐘，等佢變硬一點，會比較易切，先預熱 170 度焗爐。

5. 取出切開一件件，每件約 1.5cm 闊，在中間切開但不要切斷，兩面再塗上少許砂糖，打開反成蝴蝶樣，輕手按壓蝴蝶兩邊翅膀位置，放上不黏布或有烘焙紙既焗盤上，兩邊要稍稍分開留位，因焗後會脹大。

6. 焗爐以 170 度，共焗約 20 分鐘。

7. 亦可在最後 2 分鐘，掃上蜜糖水，更香甜。

小貼士:

1. 焗盤最好用不黏布墊住, 或牛油紙, 否則酥皮好難自動爆開, 不要用錫紙

2. 最後加蜜糖水除增加甜味, 亦令賣相閃亮, 靚一點

3. 焗後放涼才放入盒, 第 2 日更香脆