開心果及草莓紅莓 - 雪糕月餅

 

一年容易又中秋，奶黃及冰皮月餅我都有整過，家中無咩人有興趣食這些月餅，雪糕月餅都有整過 2次，今年我又再做了有兩款，開心果及草莓紅莓口味既雪糕，將佢做了幾個雪糕月餅來應吓節啦，祝各位中秋節快樂! 😌

開心果雪糕材料: 淡忌廉 250g、開心果醬 3 湯匙、開心果碎適量、煉奶 100g

草莓紅莓雪糕材料: 淡忌廉 250g、草莓紅莓乾適量、煉奶 100g

雪糕做法: 將淡忌廉打至 7 成起泡,加入煉奶,再加入開心果醬及開心果碎(或草莓紅莓乾),充分拌勻,倒入容器後,放入冰格雪 2、3 小時至硬身取出備用。

[脆皮雪糕月餅]

材料:白朱古力及牛奶朱古力粒共 250-300g (約做 6-8 個模殼用)

（1）先將朱古力粒隔熱水坐溶至液體狀態,加入一茶匙植物油拌勻。

（2）然後倒入膠模內薄薄先塗一層做外殼。

（3）放入冰箱雪幾分鐘,再塗一層做保險,免有位置冇朱古力,再入冰箱雪到硬身。

（4）將自己喜愛的雪糕口味,要軟化一點,倒入模中約九分滿,再雪,(今次我做了開心果及草莓紅莓雪糕)。

（5）雪糕雪硬後,再塗一層薄朱古力漿封頂,掃平再放入冰格雪硬脫模即成。

備註: 在朱古力粒中,可加一茶匙植物油,會滑一點冇咁杰身,朱古力粒或磚,在烘焙店有售。

切雪糕月餅小貼士： 於冰格取出月餅放室温約 5 分鐘後才切;先將金屬刀浸熱水一會後抹乾,放在月餅上要切的地方,待表面朱古力溶了後就一刀切到底;若底部的朱古力很厚,可考慮將刀抽出再浸熱水後才切,這樣朱古力層會冇咁容易切碎。

脆皮藍莓雪糕批

口感細膩，奶香濃郁，雪糕的發明，簡直就是為夏天量身打造的。夏天要食透心涼既好嘢，咁就要來分享，雪糕控有口福啦，今次做了藍莓味脆皮雪糕批，藍莓味道香濃，口感都唔錯呀，如無雪條模，可用蛋糕仔紙杯做，喜歡亦可做其他既口味架！😋🍨

雪糕材料：

藍莓 100克

砂糖 25克

檸檬汁 2 茶匙

淡忌廉 200毫升

煉奶 100毫升

脆皮材料：

黑朱古力 200克

菜油 25毫升

花生碎適量

做法:

1. 藍莓略壓加砂糖，用小火煮至濃稠成醬，需不時攪拌，隔渣待用。

2. 將淡忌廉打發企身，加煉奶拌勻，再加入藍莓醬拌勻。

3. 將混合液倒入模內，放入冰箱冷藏最少 5 個小時。

4. 用微波爐或隔水加熱法將朱古力溶化，再加入菜油拌勻，再加入花生碎待至室溫。

5. 取出雪糕，浸入朱古力漿內，再放冰箱冷藏一小時後可享用 （因雪糕非常容易溶化，最好一次取出一或兩枝雪糕浸朱古力，然後再放回冰箱）。