2008年2月20日星期三

韓國五天遊記趣


韓劇-藍色生死戀拍攝場地 (鳳凰城滑雪場山頂)

芬蘭式小木屋-渡假酒店

人參(一至六年根)整棵樣貌

雪中伴-日落美景

外型五星級-船型酒店


街頭小食-薯仔條及魷魚


韓燒晚餐-豬肉
 
 
 
 
 
 
 
 
 
 
 
 
 
 
 
 
 



農曆新年喜歡出外旅遊這個習慣,是在廿多年前當我年輕時已開始了,多個國家不論遠近大部份都已到過一或數次,今次選擇了十一年前去過既韓國其實冇乜特別原因,只是鍾意去凍既地方、同睇睇多年後再去,有乜改變咁啫!

第一次係一家三口去,今次只盛得我同亞仔兩人再去,好喇,跟我來!出發喇!是年初二至年初六五天遊,好抵喎!先一晚初一凌晨十二點半撘加班機去,坐印度航空公司飛得特別快,約三個鐘已到了首爾仁川機場,雖然當地是快香港一粒鐘啫,喂喂!仲未天光喎,點呀去邊喎!

晨早六點已搞掂晒可離開機場,當地氣溫大約零下三至八度,導遊話太早行程未能開始喎,所以加送一個無包既行程俾我地,就係去賭場玩勒,是只供外國人玩,剛新開既『七樂Seven Luck』賭場。入到去較冷清,只得幾團香港人玩,我同亞仔又不是賭客吾多識賭,惟有玩下老虎機消磨時間喇,只換了5,000 won (約港紙四十多元)硬幣玩,玩到入第四個時,嘩!犀利呀!噹噹噹噹……全場都聽倒喎,入一個500 won竟然跌下200500 won,即係中了100,000 won 呀!用港紙四個幾,贏了約九百元港紙,亞仔話留起70,000 won先,其他硬幣好快已俾架食錢機吸乾了,還好約有六百港元入袋,發了少少新年財已經好開心喇,就出去飲賭場免費既咖啡!

跟住去行首爾一個COEX MALL,係極大既地下商場,入面有一間大到極既書店,仲大過台北的『誠品書店』呀,不過大多數是韓文書,見到有微型既『電子念聖經機』,同鎖匙扣咁『大』既整本聖經,要用放大鏡睇,韓國基督教既勢力原來係好龐大架,這商場行到腳仔軟,繼續去購物熱點『明洞』,好多條橫直街,似旺角好多店舖,亦好多街頭小食,我地買左多款試食,都不錯!化妝品店好多,因韓國女仔多是有化妝,已同上次去感覺有改變,以前佢地女人仔就算落街買野都著得好整齊,加上有化埋妝添,現聽導遊講,女子現在是較注重護理皮膚,佢地試化妝品,是直接搽上面、眼及咀,見到好多女仔,在店鋪中『運吉』化好成個妝就走人喎!

中午食地道人參雞,繼續行程『青瓦台總統府 』,又去『仁寺洞』步行街,因佢地亦係跟中國一樣過農曆新年,所以也由年三十晚到年初二放足三日大假 (加埋星期六日咪五日囉),街上好多當地遊人,我地也試試他們的地道小食,晚上食韓式火鍋石頭飯,才返酒店休息,電視中睇到香港放煙花部份,第一日真係十分眼瞓同好攰,因先一晚搭機,只在飛機瞓了一陣咋,就直落開始行程,瞓上床就立即變了死豬一樣!

第二日,去韓國文化體驗DIY親手學整泡菜,同一嘗穿著韓國傳統服裝及一試人參牛奶,跟住去『樂天世界』,佢係世界最大的室內有多層既娛樂中心,更有戶外部份既驚險機動遊戲,樂天世界探險及湖上的魔術島外,尚有民俗館,室內溜冰場,電影院,百貨公司等設備俱全,係匯集娛樂與文化的超大型娛樂城,係韓劇『天國的階梯』拍攝重點場地,劇中男女主角常坐的旋轉木馬,聽講話時常要大排長龍,晚間更有大型鐳射表演群舞大遊行幣喇,我不留神跌倒呀,整傷了個膝蓋還流了些少血,睇完了所有表演,九點半才離開返回酒店休息。

第三日,進入郊區,去了『統一公園』,有各種紀念陳列,軍艦和潛水艇,軍事裝備等,可登上軍艦及潛水艇參觀,下午又去『正東津』火車站,有美麗海灘及男、女許願石,繼續啟程『雪岳山渡假村』酒店內享用有水上世界,及溫泉,我地梗係浸正宗韓式全裸溫泉喇,浸完舒適晒,就食韓式火鍋晚餐,上房大覺瞓。

第四天,去擁有1300年歷史的『洛山寺』,有個企立的海水大觀音,但要行上另一個山頭,山上實在太凍,無人想行上去,為有遠望喇,最近呢間寺被火燒毀了部份,現正籌款損瓦片;下午驅車往韓國第二大的『鳳凰城滑雪場』,我因在樂天世界跌倒腳膝痛,所以無滑雪,只坐吊車上山頂睇靚景及影相,那山頂又係韓劇『藍色生死戀』拍攝場景,景色又真係幾靚既!但要租雪地安全鞋及坐吊車來回,價錢要47,000 won,約四佰港元,在雪場自費食碟咖哩豬扒飯都要9,000 won約八十港玩,都幾貴架,晚上又食韓燒,因韓國牛肉係幾隻豬既價錢,十分貴,所以團餐係無得食牛肉囉!呢晚係住旅行社獨家住的『芬蘭小木屋』渡假酒店,二人住一個單位,內有韓式打地舖,及閣樓另有兩張床,有各款廚具,飯煲、微波爐、吧枱椅等,如一家人渡假住兩三日,自己煮下飯仔都吾錯囉,我地就只整了杯麵咋!在電視知道有長歷史的韓國國寶『崇禮門』俗稱『南大門』大火,雖然我不是韓國人,亦感到十分可惜及心疼。

第五天,返回首爾,去指定必到的政府人參店參觀及選購,因上次去買左幾仟蚊既高麗紅參還未食晒呀,我當然無買喇!繼續到『梨泰院』消費,去韓國名牌LANEIGE化妝品專門店,話平過香港喎,仲有八折,買五又再送一,女士們一窩蜂擁上,買呀買,當然有我份喇,我都買了仟多港元呀,仲驚你吾死禁,再繼續去手信店,不過我只買了少許啫,就去機場,坐晚上八點半機飛返香港,雖然較回慢一個鐘,返到家中也要凌晨一時,結束足五天的韓國之旅。

今次再去韓國,同上一次比較,都無什麼特別,最大分別是上次係一家三口去,但今次只盛得一家兩口去呢,同韓國既物價係貴了很多,聽導遊講,現在既韓國,物價係已超越日本,係全世界消費排第二位貴既地方喎,何時會再去第三次?等我諗諗先,吾通又要等十一年後!!!
 

(這是在 Yahoo blog 的舊作)

2008年2月13日星期三

辣辣壽司任你食

相片
相片
相片

前幾日放假,去深水埗西九龍中心行街街,見有間叫『明將迴轉壽司』,寫住四十幾蚊任食喎,係真唔係呀,咪即刻入去試吓先!

星期一至日都係 $ 43.9 元一位,另加一服務費,係咪好吸引呢,早上11 時開始至晚上11時,晚上10 時 30分要埋單,晚上11 時就要清場。你可以在  1小時30 (若沒有其他客人輪候等位的話,時間可以長一點的,選擇任食迴轉帶上既壽司、小食和冷麵,壽司包括有三文魚、鰻魚、蟹柳、加州卷、蟹子、北寄貝、赤貝、生蝦、多春魚、熟蝦、吞拿魚沙律、青瓜、大根、甜蛋、腐皮袋、八爪魚和墨魚等,至於小食的有炸魷魚鬚、炸蝦、炸帶子和炸三文魚頭,仲有免費既雞絲碗仔翅等等。

其實你可以自己落   order 叫 等極都未見佢出來既壽司囉,不過唔好亂咁落  order 喎,食唔晒浪費食品係要懲罰架,或叫左  唔包既野就要另外俾錢,如:天婦羅、湯麵、汽水、啤酒、清酒,貴價壽司都唔包架。

不過品質方面,當然唔可以同貴價既壽司店相比啦,但以五十蚊有找任食都  OK 啦,就算壽司平均每碟 10 蚊雞,一個人只要吃多過 5 碟就可以回到本啦,當然越食得多就越抵啦,每人起碼可食 10  碟啦,大小朋友最鍾意食壽司,不妨去試吓囉,壽司店地方都算幾大,亦有卡位,過七點去就滿晒座有排等,平日都好多人去食架,學生哥係最喜歡去,貪佢夠平,佢其他分店好似無得任食喎,希望無介紹錯俾你們試啦!


(這是在 Yahoo blog 的舊作)