簡易木糠布甸製法

以前去澳門，好多人一定會食木糠布甸，現在香港都已經係好普通又平既甜品啦，其實佢既做法亦係 very easy 簡單，材料又少，就算係新手都一定唔會撻Q，我又嚟整色整水試吓整呢隻我未做過既嘢先！

材料： (4個甜品杯份量)

馬利餅 120 g

煉奶 50 g (約 2½ 湯匙)

淡忌廉 250 ml  

可可粉 1½ 湯匙

雲呢嗱香油 1 茶匙

糖 1 茶匙

做法：

 

1) 馬利餅放入保鮮袋內，以麵粉棍轆壓至粉狀，將 1/4馬利餅粉留作飾面用，其餘餅粉與朱古力粉拌勻。

2) 將淡忌廉用打蛋器打至6成企身，加入煉奶及雲呢拿油及糖打至8成企身。

3) 先將餅粉放一層在杯底，忌廉奶液分別逐層喞入杯內，鋪平成1cm厚的第二層，(用喞袋較容易控制喞忌廉奶液)，繼續梅花間竹重複鋪至滿，最後頂一層鋪上預留木糠顏色既餅粉，放入雪櫃冷藏4 小時，（若想更好吃一點，可以延長冷藏時間至一、二天），喜歡既可放少許水果作飾面拌食，完成了，真係非常簡單易做啊！



(這是在 Yahoo blog 的舊作)

晶瑩士多啤梨乳酪慕絲凍餅

我二哥哥同我亞仔新曆生日係同一日，遇上兄弟姊妹及家人，約了5號十幾人一齊食過節晚飯，所以預先睇定書，選了個好靚既餅款，想整俾哥哥做生日餅，呢款士多啤梨乳酪慕絲蛋糕，嘩…層次是需做四層喎，又未做過呢類多層次蛋糕，今次我要向難度挑戰添，有點驚做唔成呀，先一晚用了幾個鐘完成了，係一個超正，樣又靚既凍餅，當晚攞到去酒樓，打開個盒亮一吓相，大家即嘩然話好靚，個個立即影相，話差點不相信係我整既，入雪柜先，我們作為餐後甜品，哥哥切餅分俾各人，個個開始試食俾分啦，有點驚呀，因為連自己都無試過味，呵呵，好開心呀，大家都話好好食，俾100滿分我呀，兩個哥哥仲讚我好有職業水準，有幾層不同既口感，樣靚而好味，我都極滿意這個見得人既凍餅，亞仔都讚了我好幾次，話唔制呀，舅父這個餅咁靚及好味，我既黑森林就係失敗之作，我承諾得閒再整囉，哈哈哈，呢個係自家製造 win win 出品，出面係無得賣架，今次我又多了點點信心啦喂！

 

[8吋圓形甩底餅模一個]

餅底材料：
消化餅碎105g
溶牛油45g

士多啤梨慕絲：
士多啤梨乳酪170g
淡忌廉290g
士多啤梨茸250g (我用現成的)
砂糖25g
魚膠片30g

淋面士多啤梨果凍：
士多啤梨啫喱粉90g
魚膠片8g
水320g

飾面水果：
士多啤梨
藍莓
蜜桃 (各適量)

裝飾：
刨白朱古力碎及白朱古力絲條

[做法]

1.蛋糕模放入蛋糕咭紙在底部。
2.餅碎加入溶牛油拌勻，倒入蛋糕模中壓平，先放入雪柜冷藏一小時。
3.淡忌廉打至七成企身放回雪柜備用。
4.士多啤梨洗淨，切去頂部白色部份，放入攪拌器，加入砂糖，打士多啤梨茸，(或可買現成既士多啤梨茸)。
5.魚膠片用冰水浸軟，用小煲放入士多啤梨茸加熱至60度，加入魚膠片拌至完全溶解拌勻，座凍水冷卻。
6.士多啤梨茸放涼(20-30度)後，及士多啤梨乳酪，加入已打起之淡忌廉內搞勻，倒入蛋榚模中拌勻，放入雪柜冷藏2小時。
7.預備淋面士多啤梨果凍，水用小煲加熱，放入士多啤梨啫喱粉拌溶，再加入已用冰水浸軟之魚膠片拌溶，熄火待涼(可座冰水冷卻)。
8.將預備之新鮮士多啤梨及其他水果切好，排好在慕絲面，先倒入少許淋面啫喱果凍液，放入雪柜冷藏至凝固，主要係固定生果位置，取出再倒入餘下之啫喱果凍液，再放回雪柜冷藏至凝固(雪一晚係最好)。
9.取出後可用熱毛巾圍邊側脫模，面可加白朱古力碎圍邊及白朱古力絲條作裝飾完成啦。

 

  



(這是在 Yahoo blog 的舊作)

黑森林蛋糕 Black Forest Cake

  

因亞仔牛一，佢最喜歡食黑森林蛋糕，前幾日在烘焙店買定所需材料，昨晚我立即動手，因想做個 8吋既蛋糕，今次焗蛋糕時間可能過長，焗得硬了，忌廉又打得不好，味道還可以，好彩亞仔無咩要求，佢話都 OK喎，大家睇吓我今次既失敗之作，實在太差勁不合格啦，真係要繼續加油呀！

端午節到，有關懷獨居長者既機構，搞了探訪送糉及其他食品活動，星期六下午我也有參加，工餘時能去關心一吓其他老人家都幾有意義嘅，祝大家都有個開心愉快既端午節啦！

《8吋蛋糕模一個》

蛋糕材料：

雞蛋 160g (3隻)
砂糖 80g.
低筋麵粉 80g.
可可粉 2茶匙
牛油溶液 1 湯匙

蛋糕做法：

1. 預熱焗爐 190度，蛋糕盆墊紙並掃油及沾上少許高筋粉。

2. 蛋和糖打至杰身，將篩過既麵粉，可可粉加入。

3. 最後輕輕拌入牛油溶液，倒入糕盆，焗 20-25 分鐘。

4. 取出倒扣，完全冷卻後才脫模，橫切成三片。

餡料：

黑加侖子啫喱粉 90g (1盒)

魚膠粉2茶匙

熱水 100g

冧酒少許

餡料做法：

1. 啫喱粉用熱水開溶，加入魚膠粉及冧酒拌勻，盛盆內雪至凝結，取出切粒。

2. 甜忌廉打起，取出 1/3 份作餡，其餘用作裝飾蛋糕面及側面用。

飾面：

甜忌廉 250g
黑朱古力碎適量
士多啤梨、蜜桃及藍莓適量

綜合做法：

1. 在轉盆上，先放一片蛋糕，面上鋪一層忌廉後，一層已切粒啫喱餡，用少少力壓一壓蛋糕，如此類推

2. 在蛋糕面及邊上塗忌廉後，批敏至平滑，側及面灑上朱古力碎

3. 蛋糕表面可放喜愛生果作裝飾，完成了入雪櫃，最好雪一晚才食啦，就最好味啊。



(這是在 Yahoo blog 的舊作)