西貢碼頭既海鮮街
碼頭邊一家大細享受釣魚樂
呢隻就係我們坐既遊艇啦!
一到達目的地,個個第一時間拿起八爪鈎出動釣墨魚
初時團友都好有心機釣架
當釣到 2隻墨魚時影,好新鮮,成晚合共得 3隻囉,你話死未!
復活假期，朋友話想玩釣墨魚喎，踏入夏天，釣墨魚活動又成為大家的目標，即上網睇睇，專門搞本港團既旅行社，睇佢那日有位先，星期六仲有少量位呀，行程包括：遊艇+海鮮餐+釣墨魚用具+即釣即煮；立即去報名，兩日後可去發，黃昏五點集合喎，我們提早去了西貢四圍逛逛，買了上次在碼頭買過好正既紫菜及蝦乾。
五點於西貢洪記海鮮酒家享用海鮮餐
海鮮餐(餐單)：
清蒸海上鮮
白灼游水蝦
清蒸鮮鮑魚
鮮魷魚時疏
仿古鹽焗雞
秘製排骨
魚香茄子肉鬆
郊外油菜
絲苗白飯
食完晚餐，六點幾再集合在西貢碼頭，上船出海釣墨魚啦，呢團都約有40人，船到達了公海 (可以有墨魚釣既地方)，船上安置幾枝用來照墨魚的大光燈，因為墨魚會向有光的地方游過來，大家分派了魚絲八爪鈎，個個都在第一時間出動搵個靚位置，開始做釣魚郎，整個釣墨魚時間大概會有兩個多小時左右。
過了20分鍾左右，個個都釣唔到喎，海上好寧靜，睇唔到有墨魚蹤影，間中有班魚仔游過，有人開始釣到第一隻啦，跟住再有人釣到第二隻及第三隻，之後就再無咩聲氣，手都攰晒，有多個年輕人開始放棄，打機及玩電話、傾偈等，唔制呀，我同朋友就成晚食白果，好在有海風吹拂下都幾舒服，成團40個人，成晚只係釣得三隻墨魚咋，無得試即釣即煮墨魚係咩味道喎，船家話當晚唔合風向，佢話有西南風一定多墨魚，不過有三隻都不是最低紀錄，有些團都會食蛋啊，差不多十點開船返西貢碼頭散隊，五點幾食晚餐太早啦，玩完大家都有點餓，在市中心行了一圈，食店差不多都閉晒門，無法啦，要搭車返到家附近才食碗雲吞麵，明年有機會再去玩過喇！
(這是在 Yahoo blog 的舊作)
