2011年7月27日星期三

日式芝士蛋糕 - 兩食




 
大家還記得嗎,當年在港風靡一時,伊藤X 既日式芝士蛋糕呀,每日都要排長龍等出爐買,相信你都係其中之一啦,香港人就係咁囉,新野係好捧場,一旦熱潮過了,無咩人再想食,那間舖既分店要陸續結束,現只餘得幾間,點解港人咁貪新忘舊呢!
日式芝士蛋糕,佢既清淡芝士味道及鬆軟感覺,焗出即熱食,感覺十分鬆軟,把它雪凍食,清淡芝士味道及清涼感覺又唔同,幾懷念當年要排隊購買既情況,忽然記起,即搵資料焗吓當年點解咁受歡迎既蛋糕先,原來係非常簡單易做,我早上試焗了一個好成功,約了兩位朋友食晏,送俾佢地分享,晚上再焗一個,我加了士多啤梨粉既特別版留俾自己人享用啊。
材料: (6吋蛋糕模)
低筋麵粉 30g
粟粉 10g
蛋白 2隻
蛋黃 2隻
糖 40g
卡夫芝士片2片
淡忌廉 50g
淡牛油 30g
做法:
1. 預熱焗爐 170 度 (焗盆加熱水)。
2. 蛋白 + 糖 25克,用電動打蛋機打至企身。
3. 蛋黃 + 糖 15克,用手打至淡黃色忌廉狀。
4. 先篩好麵粉及粟粉。
5. 芝士片撕成小塊 + 淡忌廉 + 牛油,一同隔水坐熔攪勻。
6. 將 (3) + 入 (2),篩入麵粉及粟粉,再加入 (5) 攪勻。
7. 注入模中,以 170 度焗 30 分鐘,焗盆要放沸水,完成後需要在爐內靜置 10 分鐘後才出爐。
小貼士:
1) 打發蛋白,糖要分3次加入
2) 焗爐必須預熱至170度
3) 焗至15至20分鐘時,蛋糕面已呈現啡色,這時要蓋上一張錫紙,防止表面變焦
4) 喜歡可塗杏梅醬,士多啤梨醬或藍梅醬拌食
5) 如用可脫底模要先用錫紙包蛋糕模底避免水份流入蛋糕中。

 Photobucket Photobucket Photobucket Photobucket Photobucket Photobucket Photobucket


(這是在 Yahoo blog 的舊作)

2011年7月21日星期四

流浮山與妙法寺遊

     
     








































    星期天有網友邀請,參加了一個吹水同鄉會主辦既非常超值既一天遊,我仲帶了一位朋友去,8架車共四百幾人好犀利喎,集合後,浩浩蕩蕩一齊向元朗出發,第一站係[壽桃牌]麵食展覽館,睇完介紹佢既歷史來由,開始購麵,價錢抵好多喎,大家都滿載上車,跟住去[生活源]平價日常食及用品購物,位於工廠大廈上,現都幾流行樓上舖,當然比街舖平點啦,我地都買了些洗頭護髮及護膚品啊。
     
    跟住前往流浮山食海鮮餐,食完指定動作就係行吓那條海產街,好耐無來囉,太多嘢賣,我同朋友都買了最出名有蠔味既蠔油及少許乾貨,之後坐車去[恆香]餅家整餅工場,睇吓工友們點樣做亞茂,睇完仲每人派一個新鮮出爐既老婆餅,就近中秋,所以仲有月餅試食,真係好飽啊,當然又係購餅食時間啦,但我無買喎;到了最後一站,係屯門既[妙法寺],已好久無來了,乜原來在隔離起多了一座同舊址截然不同風格既[新妙法寺]。
     
    睇資料話籌建逾十年,耗資近二億元在屯門藍地{新妙法寺綜合大樓},2010年3月開光,10月開放,外型獨特,採用環保理念建築,外型正面像菩薩頂帽、側面像玻璃蓮花,大樓共分七層,第七層是佛殿;第六層是圖書館及教室;第五層是禪修房間;第三層是大禮堂;而因大禮堂樓層高,沒有第四層;第二層及第一層分別是辦公室及停車場。實際得六層,並有升降機,整座建築物沒有金碧輝煌的瓦頂,用上現代材料如鋼架為結構,外牆用光滑的微晶石,階梯下仲有多種顏色好靚既睡蓮池,還有花草樹木如菩提樹、羅漢松、無憂樹、心經樹等等,影友拍攝又多點新題材,這處成為屯門區新地標及旅遊觀光熱點,大家有機會可到新舊妙法寺行吓,就算不是參神拜佛,也內進觀賞一吓佢既壁畫,雖然新、舊妙法寺有點格格不入,睇睇佢既環保理念既設計,在頂層十分清涼,亦可遠眺青山及周邊景色都唔錯,我地參觀完要回程,結束這一天超抵,又食又拎既遊玩啦!

     
     
    (這是在 Yahoo blog 的舊作)
     
    

2011年7月15日星期五

紅豆綠茶忌廉卷蛋

















之前在日本公司買了一包靚綠茶粉,趁住冰格盛餘有兩杯紅豆蓉,一杯整了兩盒及幾小杯,桂花紅豆糕俾自己及死黨,另外一杯留下,想做個紅豆綠茶卷蛋。其實我與家人都不喜歡食卷蛋架,但喜歡紅豆綠茶配搭,所以試做出我的第一卷啦,綠茶蛋糕既色水都幾夠,但個樣就衰衰地,唔夠軟綿綿,卷蛋其實幾有難度,就係用牛油紙及木棍將蛋糕皮捲起,但我做了反卷,非常易捲,估不到第一次捲就成功了!如初次做卷蛋既朋友,選擇反卷就容易得多了。

卷蛋皮材料: (8 X 10吋長方形焗盤)
低筋粉 70g (要篩過)
綠茶粉 10g (要篩過)
蛋黃 4隻
蛋白 4隻
砂糖 50g
植物油 4湯匙
鮮奶 3湯匙
紅豆忌廉餡料:
甜紅豆蓉 60g
甜忌廉適量約 80g  (如用淡忌廉可加入糖打企就可以)
飾面:糖粉適量約 6g
做法:
1) 雞蛋要分開蛋黃及蛋白,麵粉、綠茶先篩過備用
2) 蛋黃加入植物油用蛋拂攪勻加鮮奶攪勻,加入粉類攪勻備用
3) 預熱焗爐200度,蛋白略打至起大泡,分兩次加入糖,打至發起
4) 取約1/2蛋白加入蛋黃糊拌勻,再倒進餘下的蛋白全部拌勻
5) 倒入已墊上牛油紙的焗盤中,掃平麵糊,入爐中間層焗約10-12分鐘至轉色
6) 蛋糕出爐撕開焗爐紙放涼,打企甜忌廉,紅豆蓉粒隔去水份
7) 先塗一層忌廉在蛋糕面上,再塗一層紅豆,用另一張牛油紙捲起蛋糕,收口要向下,放雪櫃雪凍取出,篩上糖粉,可以切件啦。
 

(這是在 Yahoo blog 的舊作)