士多啤梨乳酪慕絲 - 母親生日用

我媽媽生日噃，家人約埋一齊食晚飯同媽媽慶祝，我得閒特為她整了一個之前做過差不多既生日餅，呢款士多啤梨乳酪慕絲蛋糕，今次只是做三層層次啫，面層係啫哩層，先一晚用了幾個鐘完成了，靚靚樣既凍餅，當晚攞到去酒樓，當餐後甜品，打開個盒亮一吓相，媽媽話好靚呀，係妳整既咩，哈哈係呀，樣靚酸酸甜甜幾美味，我都滿意這個見得吓人既凍餅，呢個係我今年第一炮自家製造 win win 出品既生日餅啦喂，祝媽媽生日快樂，身體健康！

[8吋圓形甩底餅模一個]

8吋海綿蛋糕一片

士多啤梨慕絲：

士多啤梨乳酪 200g

淡忌廉 250g

士多啤梨茸 260g

砂糖 25g

魚膠粉 30g

淋面士多啤梨果凍：

士多啤梨啫喱粉 80g

魚粉粉 8g

水 310g

飾面水果：

士多啤梨

藍莓

蜜桃 (各適量)

朱古力針少許

[做法]

                       

1. 蛋糕模放入蛋糕咭紙在底部。

2. 將焗好8吋海綿蛋糕一片，一圈收細約半吋

3. 淡忌廉打至七成企身放回雪柜備用。

4. 士多啤梨洗淨，切去頂部白色部份，切細成茸，加入砂糖，攪拌成士多啤梨茸，(或可買現成既士多啤梨茸)。

5. 魚膠粉，用小煲放入士多啤梨茸加熱至60度，加入魚膠粉拌至完全溶解拌勻，座凍水冷卻。

6. 士多啤梨茸放涼(20-30度)後，及士多啤梨乳酪，加入已打起之淡忌廉內搞勻，倒入蛋榚模中拌勻，放入雪柜冷藏2小時。

7. 預備淋面士多啤梨果凍，水用小煲加熱，放入士多啤梨啫喱粉拌溶，再加入魚膠粉拌溶，熄火待涼(可座冰水冷卻)。

8. 將預備之新鮮士多啤梨及其他水果切好，排好在慕絲面，先倒入少許淋面啫喱果凍液，放入雪柜冷藏至凝固，主要係固定生果位置，取出再倒入餘下之啫喱果凍液，再放回雪柜冷藏至凝固(雪一晚係最好)。

9. 取出後可用熱毛巾圍邊側脫模，面再加入水果圍邊及朱古力針作裝飾，完成啦。