日本中部遊記 (1)

12月3日出發，今次自由行選擇去日本中部，係昇龍道其中兩個縣，三重縣與愛知縣，在名古屋中部國際機場落機後，即在隔離坐高速船過大海，去了另一個縣(三重縣)津港，再搭巴士到津駅，再轉 JR 快線，去到伊勢市既二見浦，在附近晚餐，步行去預訂了既和式民宿，入住後先浸吓溫泉，(住咁遠，因為貪佢係和式榻榻米，又望海，有溫泉浸，附近海濱行 10 分鐘已係景點)！

12月4日，第二日六點起床到附近睇日出，二見浦海上既『夫妻岩』，係其中日本出名睇日出與月出既靚景點，可惜天不造美，是陰天，變了看海的日子，海旁邊有間『二見浦興玉神社』，海岸周邊景色也不錯！

之後搭 JR 到伊勢市 café 食早餐，跟住前往 『伊勢神宮』參觀，它是全日本八萬幾個有登錄既神社之首，位於日本三重縣的伊勢市，在日本影響最大，規格最高的神宮，是日本人一生中夢寐以求，必定要去朝拜起碼一次既重點神聖地，佢地方太大又分散晒，有內宮、正宮、主宮、外宮、及多個別宮，仲有博物館《徵古館、農業館、美術館》，內裡去外宮仲要搭巴士，要行足一日啊！

最為特別的 『伊勢神宮』中既各座神社，每座都會預留同等大既地方在旁，每二十年會將神社新建一座一模一樣的神宮，舊的拆卸，搬去左邊或右邊，叫「式年遷宮」，是日語的寫法，這古法建築，已持續了千多年；更特別神社內既所有材料食品，神社遷宮的建設木材料，都是自給自足，無須外求，在博物館可見到。在“伊勢神宮”周圍，紅楓葉處處，有些已變橙色，有些已變黃或綠，仲有香港既楓香種紅葉，竟然發現有四季櫻花開放了，更有好多散發著金黃色又大既銀杏樹呀！ 

在『伊勢神宮』內宮前既 おかげ 横丁，好多手信店、食品店、特色店，日本名物赤福本店也在此地，可嘆茶食「赤福」，好有風味，佢既紅豆餡係在外面，粉糰是在內裡啊！周圍行吓，晚餐於附近食若草堂，呢間時光倒流阿婆一人主理既伊勢名物，伊勢烏冬，係好正呀，後返民宿又浸吓溫泉，休息了。 

( 待續下篇   2   )