荷塘吐艷在康樂公園(2024)

夏日欣賞荷花 (蓮花)，攝影發燒友必會到各處影相既節目，粉嶺康樂公園之荷花仙子，已經靜悄悄地開放了，佢有粉紅色及白色既荷花，有單瓣及有好多複瓣既牡丹荷花，呢個公園細細，現兩邊池中都有種幾款荷花，紅白互相暉映，平日不算太多人影相，約有十多個男女拍友在場拍攝荷花，荷花一般在 6月至 8月開放，我今次 6月中去，好多荷花已盛開，有些花蕾仲未開，還有睡蓮，公園內其他植物都有不少，賞荷花既季節，天氣都十分熱，會比較辛苦的啊！ 

百香果芝士蛋糕

百香果，俗稱熱情果，原產於巴西，產於美洲的熱帶及亞熱帶地區。因其果汁營養豐富，氣味特別芳香，散發出香蕉、菠蘿、檸檬、草莓、芒果、石榴等等多種水果的濃郁香味，而被稱為「百香果」，所以百香果的果汁常被用作香料，加在其他果汁中，近日見有無咁酸既黃金百香果，今次試用佢做酸酸甜甜又夠香味，百香果芝士蛋糕作家人生日餅，祝阿仔生日快樂，健康幸福！😍🍰

餅底材料：6 吋

馬利餅 / 消化餅 80克

淡牛油 40克

餅底做法：

1. 淡牛油室溫放軟，馬利餅乾壓碎。

2. 牛油加入馬利餅碎中拌勻。

3. 倒入餅模壓實後雪藏 30-60 分鐘。

芝士層材料：
忌廉芝士 200克
淡忌廉 150克

砂糖 15克

百香果 4-5 個 （榨出果汁 50毫升）

魚膠片/魚膠粉 10克

芝士層做法：
1. 將放軟既忌廉芝士拌勻，打發淡忌廉，加入砂糖，打發至濕性約 6 分杰身，加入忌廉芝士糊中拌勻。
2. 芝士忌廉糊加入百香果汁，魚膠片凍水浸軟隔去水份， 微波爐坐溶，放涼些拌勻，再加入芝士忌廉糊中混合拌勻。
3. 倒進有餅底既模具中掃平，冷藏 40-60 分鐘。

果凍面層材料：

百香果汁 45g  (留起少許百香果籽作裝飾)
魚膠片/魚膠粉 7 克
清水 50 毫升

果凍面做法：
百香果鏡面層，蛋糕冷藏約 1 小時後取出，魚膠片凍水浸軟隔去水份，微波爐坐溶，放涼些加水拌勻，再與百香果汁拌勻過篩，放涼後淋上蛋糕面，加入些少百香果籽作裝飾，繼續入雪櫃冷藏約 3-4 小時，取出敷熱毛巾圍邊脫模，可在蛋糕面加上喜愛既水果或其他作裝飾，完成了。