自家製脆皮燒肉

在網上看到好多朋友都自家製脆皮燒肉，搵了幾份資料參考過，見做法都幾簡單噃，心血來潮想試吓整，放假到街市肉檔，買了一塊新鮮豬腩肉泡製一下，出來既效果也不錯，皮脆卜卜肉汁也多，味道同出面買既都差不多，都幾好食，第一次整自己都算係滿意啊！

材料 :

連皮五花腩肉斤半至2斤

粗鹽適量

醃燒肉料 :

紹興酒 1/2 湯匙 (醃肉時先將酒塗上)

幼鹽 2茶匙

糖 1/8 茶匙

雞粉 1/4 茶匙

沙薑粉 1/4 茶匙

五香粉 1/8 茶匙

製法 :

1) 五花腩肉留皮，先用刀在表皮上刮去污穢物及毛，用水洗淨，再將五花腩放入滾水內煲大約 6-8分鐘至約五成熟，然後取出用凍水過冷河。

2) 五花腩待涼後抹乾水份，用豬插或針釘在表面刺鬆豬皮表面，(必須要多，要密，否則豬皮不會爆沙鬆脆) 之後要先將酒抹上，再將其他醃燒肉材料拌勻，平均抹上整塊腩肉。

3) 將五花腩吊起吹乾最少 4-5 小時，(我因家中冇吊鈎，所以只放在蒸架上風乾5小時以上)。

4) 用錫紙將五花腩肉包裹，只留下豬皮部份不用包，錫紙的高度要比五花腩肉的高度多高1吋，錫紙與腩肉中間不能有空隙，可在錫紙四邊用牙籤拮住固定。

5) 包裹好的腩肉，在腩肉皮上面放下約1吋厚的粗鹽，把鹽輕輕壓實，表皮每一處地方都要用鹽覆蓋及不要被錫紙遮住。

6) 將包好的五花腩小心地放入已預熱15 分鐘 (230度) 的焗爐內，先焗 50 分鐘。

7) 取出將腩肉表面的鹽取走，再將燒肉放回入焗爐內，用210 度烤 20-25 分鐘，烤至豬皮鬆脆，因各爐火不同，時間要自己執生。

8) 待燒肉稍涼後，可斬件上碟。

註:

(A) 要買到靚及滑的五花腩肉，要買近豬胸口部位有少許骨及半肥瘦的五花腩，否則，其他部位比較鞋口。

 (B) 買五花腩時，要店員盡量將豬肉切成正方形一點，不要切長形，否則，太薄好難將五花腩包裹至企身。

 (C) 用鹽焗的方法是令到豬皮表面水份全部蒸發，達至表皮鬆脆效果，所以，沒有被鹽覆蓋的地方表皮會較韌。



(這是在 Yahoo blog 的舊作)