綠茶味木糠布甸

之前做過朱古力味既木糠布甸，這甜品其實佢既做法係 very easy 簡單易做，材料又少，就算係新手都一定唔會撻Q，我又嚟整色整水試吓另一隻味道，就係綠茶味木糠布甸，我買到呢隻綠茶粉係特別香既，溝埋一齊食又香又不太甜真不錯呀，上次用餘有點栗子蓉，另外整多兩杯特別版本試吓先！

材料： (4個甜品杯份量)

馬利餅 150 g

煉奶 50g (約 2½ 湯匙)

淡忌廉 250 ml

綠茶粉 1½ 湯匙

雲呢嗱香油 2 茶匙

糖 2 茶匙

做法：

1) 馬利餅放入保鮮袋內，以麵粉棍轆壓至粉狀，將餅粉與綠茶粉拌勻。

2) 將淡忌廉用打蛋器打至6成企身，加入煉奶及雲呢拿油及糖打至8成企身。

3) 先將餅粉放一層在杯底，忌廉奶液分別逐層用匙放入杯內，鋪平成1cm厚的第二層，(或用喞袋較容易控制喞忌廉奶液)，繼續梅花間竹重複鋪至滿，最後頂一層鋪上餅粉，放入雪櫃冷藏4 小時，（若想更好吃一點，可以延長冷藏時間至一、二天），喜歡既可放少許水果作飾面拌食，完成了，係非常簡單易做的啊！



(這是在 Yahoo blog 的舊作)