正宗越南牛肉河
前總統府
總統府 內接待外賓用
越戰用的坦克車
古芝地道路線圖
哩個就係其中一個地道入口, 我地當然唔係入這個啦
打越戰女裝束
30公尺高, 亦係全世界最高的耶穌像, 在耶穌山上
頭頓海岸遠景, 在耶穌像肩膀上面影
戰爭遺跡博物館, 其中一館內
戰爭遺跡博物館既戰機
象魚餐幾有特色
市政廳夜景
胡志明像
聖母大教堂
百年郵政大樓
暢遊湄公河
橫衝直撞既電單車, 滿街都係, 好驚呀, 唔識過馬路啦
越南人結婚用既夫妻糕, 亦係我們買的手信其中之一
何解今次會選擇去一個較落後既國家『越南』旅遊呢？先進既都去過不少了，想睇睇佢地有幾落後，生活及民生係點樣囉！因08年中結束了小生意，只做點兼職，年尾比較清閒，可以早點出發，避開新年附加既費用，21 號晨咁早六點半就去到機場，經過兩個半鐘之後，我地坐既國泰又新又超大 777-300 飛機，就緩緩咁抵達『胡志明市』既機場喇！『越南』人既生活真係好悠閒噃！所以咩野都慢過人架！過關每條隊都係得果十幾個人，但有四十個閘口，我地就等左半個鐘以上，等行李又鬼咁耐，天呀！有無咁慢呀！
我地終於正式在『胡志明市』舊名『西貢』登錄喇！架旅遊巴有四十多個位，只得廿五個團友，真係一人坐兩個位都仲得呀！『越南』比香港慢一個小時，總面積 331,689 平方公里，人口約 7,200萬，淨係『胡志明市』已有 800 萬人口。
不需一個鐘既車程，我地就來到胡志明市中心去食午餐，就係『越南』那間最出名既店鋪《和粉》食牛肉雞肉河粉，跟住前往《前總統府 》《聖母大教堂》《市政廳》同《百年郵政大樓》參觀喇！在旁邊還見到有成座既《滙豐銀行大廈》，《Diamond Plaza》係現代化高級既名牌購物大商場，繼續乘車去『頭頓市』的《耶穌山》。
面向南中國海耶穌像有 30 公尺高是全世界最大，建於比較矮的山上，係美國人 1971 年建成的。徒步上《耶穌山》需要大概一小時，沿途可飽覽美麗的藍天白雲和『頭頓』海岸景色，雖然我不是信耶穌，也值得睇的！不過要行七百幾級樓梯囉，好啦，終於到達目的地，耶穌像既面前，大家看到耶穌像的肩膀上有人嗎？因為耶穌像內有通道的，再上去又要行百幾級樓梯呀，上《耶穌山》合共即係差不多有九百級啊，暈未！好窄既樓梯，終於上到肩膀啦，飽覽全『頭頓市』的景色都唔錯呢！為保耶穌像內部的整潔，入內前必需脫下臭鞋，耶穌像內，也有不少宗教油畫和藝術品供人參觀。
跟住參觀一間二百多年的《鯨魚古廟》，廟內有一很大的鯨魚骨，相傳大鯨魚為拯救當地漁民而犧牲生命，因此漁民興建了這鯨魚古廟，並供奉此鯨魚，第一晚夜宿『頭頓』酒店。再返回『胡志明市』既『堤岸』區，係『越南』最大既唐人區，有去《天后廟》，《歷史博物館》，再去『美拖市』遊船河到《湄公河》三角洲，《椰子島》天道教教壇，《泰山島》觀賞及享用熱帶果園水果。
參觀『古芝地道』係與美軍打越共戰時用，表面上其實與普通叢林沒有甚麼分別，不過地道設有不少隱閉式特別通道，當地的軍人便可以進入地道內。此外，『古芝地道』也設有多個不同程度的陷井位置，使美軍因無法熟悉當地環境而陷入越共的圈套了，不是重傷便是死亡了。現在只提供一些較寬闊的地道供遊人參觀。長度為 25 米至 50米，我地也有入到地道內參觀，地道除了十分黑暗之外，還很熱很焗，十分狹窄，有些還需要趴住泥地行走，好彩泥地是乾爽啫，但有點抖唔到氣呀。以美軍的身形，更加難以進入地道內啦，趴完大家體驗到，當時打越戰是時既生活係多麼的艱苦呢！
去《戰爭遺跡博物館》，是在『胡志明市』第3郡，於 1975 年開設，館內展出美國人在越戰時期的展品，博物館包含八個主題展廳，分佈在不同的建築物內。館內也放置當年美軍所使用的軍備，包括直升機、戰機、炸彈、坦克車和轟炸機等等。博物館其中一座建築物稱為《虎籠》，作為南越政府監禁政治犯。其他展品包括圖像照片，並附設英文、越文和日文描述。展示越戰時美軍使用的橘劑及其他化學武器對受害者的傷害，十分殘酷。其實博物館頗簡陋，無冷氣提供，展品不是美軍軍備，便是圖像照片，也許越戰後的結果就是這樣嗎？其實越戰所帶來的影響，不但造成大量平民及美軍傷亡，亦引發一連串好多問題呢。
由於『越南』曾經係『法國』殖民地，所有遺留不少『歐洲』式風格既建築物，『法國』管治時期建的長方形建築物規格，現在仍然見到街頭，大部分既樓房都是前面窄小，後面長長的兩三層樓房，大多數係祖傳一代傳俾下一代用。『越南』有個痛苦既過去，發展經濟是這幾年的事。大多數民眾的生活還是很簡樸，超低的薪資加上過高的生活費用，使人民為求生存，到處辛苦搵錢，『越南』自開放以來，由於投資商人和觀光客的大量湧入，許多因應性的消費場所愈來愈多！
因『越南』也是過中國既新年，所以好多人趕車返鄉過年，街上佈置得好靚，有古董街，又有條花街擺滿合時既鮮花供人欣賞及影相，亦有花市行，也有舞龍助慶好熱鬧。『越南』盛產水果，比較有特色的是火龍果、棗、龍眼、山竹、柚子、三子櫻桃和蘋果等，『越南』咖啡味道香濃甜香，相當不錯。漁米之鄉既『越南』，米飯係好靚，手工藝及漆器製品做得也不錯！『越南』既銀紙真係極低，我地一用錢就十頭八萬盾啦，哈哈！其實佢地一百萬盾只係港幣五百蚊啫！
交通方面十分混亂，車輛從不同方向駛過來，電單車多到嚇死人，大家要過馬路，就要俾點耐性啦，『胡志明市』每兩個人就有一部電單車，見到佢地一架車坐成四、五個人，真係好犀利！『越南』雖然有多條大直公路，原來無一條係高速公路，原因係太多電單車駛用太危險，所以最高速只可開到 40 咪，我地『香港』人真係感覺佢行得太慢啦！《西貢貿易中心 Panorama 33》33 層已是暫時全市最高既大廈，不過越南人是不喜歡住咁高既屋呀，五星級酒店在『胡志明市』都有不少，已有好多廿多層高，我地當然都係住五星級啦！
這是五日我在『越南』既見聞，他們經歷個長時間戰爭既痛苦過去，小市民都會珍惜現在所有，大多數人做一點小生意為生，悠閒生活他們都幾自在滿足，發展了幾年旅遊，現已有好多中外遊客，但比我既感覺係似十多年前，剛發展既大陸相似囉！
(這是在 Yahoo blog 的舊作)
