天氣仍然是冷，都要繼續保暖，上回整過煲仔飯，今次又改變一吓材料，煮既係足料『生炒糯米飯』，亦是用玫瑰鍋來做，其實糯米飯我都係第一次整，仲要由生米炒到熟喎，試試先，用玫瑰鍋炒，不黐底容易處理是不錯呀，雖然炒到手軟，味道好鮮，又暖笠笠，當然都要配碟青菜就更完美啦。
材料 (大約 4 碗份量) :
糯米 2 膠嘜 (浸 4 小時以上)
臘腸 1 條 (切粒)
蝦乾 8-10 隻 (切粒)
小元貝 6-8 粒 (用熱水浸軟)
冬菇 4 隻 (浸軟切粒)
雞蛋 1 隻 (煎成蛋塊再切絲)
葱花及芫茜 少許
清雞湯及水 (適量)
煲仔飯醬油 (適量)
做法：
1) 先將切細既臘腸、蝦乾、元貝、冬菇、加少許魚露及紹酒爆香。
2) 玫瑰鍋周圍掃少許油，用中細火，放入浸透既糯米在鍋炒，見乾身就加少許清雞湯與浸過元貝、冬菇既水，切記不能一次過落太多水份，否則就會失去口感，不停炒及加入水份，炒大約 18分鐘後，放適量煲仔飯醬油，再炒及拌勻，可試試糯米熟的程度及味道。
3) 炒到糯米夠軟身，就可放入爆香了既臘腸、蝦乾、小元貝、冬菇材料，再炒多幾分鐘，可熄火加入蛋絲，灑上葱花及芫茜，玫瑰鍋冚蓋焗多數分鐘更理想，原煲上枱可保溫，食得啦。
冬天天氣凍, 要保暖, 好多時都會食到有臘腸既煲仔飯, 今次要改變吓材料, 煮既係『栗子雞粒雜錦煲仔飯』, 試用玫瑰鍋來做煲仔飯, 都係第一次, 方便易處理, 又不錯呀, 用玫瑰鍋煮, 一粒飯都無浪費, 全部可食晒呀, 當然要配多碟油菜就更完美了。
材料： ( 2-3人份量 )
栗子 10-12 粒 (去殻每粒切 4-6 份)
雞扒 1 塊 (去皮切粒醃好)
冬菇 4 隻 (先浸軟切粒)
牛肝菌 適量 (先浸軟切粒)
小元貝 4 粒 (先浸軟)
雜菜粒 少許
蒜頭、乾葱頭 少許 (切碎)
薑米、葱花 適量
紹酒 少許
做法：
1. 雞扒切粒用蠔油、少許麻油、老抽、糖、紹酒, 約醃 20 分鐘備用。
2. 爆香蒜蓉、乾葱碎、薑米、加入冬菇、栗子, 加少許鹽、胡椒粉, 紹酒炒幾分鐘, 雞粒亦炒約熟後備用。
飯制法：
1. 米洗淨浸約30分鐘。
2. 浸過既米, 放入玫瑰鍋中, 用平時電飯煲煮飯既水量, 冚蓋中細火煮 8 分鐘, 加入餸料, 再細火煮多 10 分鐘, 加葱花, 熄火焗約 5-8 分鐘即可食用, 隨自己喜好, 加入些少醬油將飯拌勻, 更美味。
法式梳乎厘這個甜品，原味以前已做過兩次了，今次轉吓口味，加入薑汁，入口每啖都充滿薑既香辣味道，截然不同，冬天食薑汁可暖暖個胃，大家如果喜歡薑既味，都可以試一試，簡單又好味，焗好要快手趁熱立刻食呀。
材料：約 5-6 杯份量
鮮奶 120g
低筋粉 10g
粟粉 16g
薑汁 2 湯匙
蛋黃 2 隻
蛋白 2 隻
砂糖 40g (分2份用)
掃焗杯用：
淡牛油少許, 砂糖適量
做法：
1) 先要預熱焗爐 180 度。
2) 蛋黃加入 20g 砂糖拌勻, 加入已過篩之麵粉及粟粉。
3) 鮮奶叮熱, 加上材料 (2) 內, 慢慢拌到杰身, 成吉士狀, 加入薑汁攪勻。
4) 蛋白先打至起泡, 加入 20g 砂糖, 再打到企身。
5) 將少份量之蛋白霜加入麵糊混和好。
6) 再將所有麵糊加入蛋白霜中輕手拌勻。
7) 將焗杯周圍掃上淡牛油, 再加入砂糖, 整個杯都要沾上砂糖, 主要是能將材料焗發升高 。
8) 蛋白麵糊, 分配放入每隻焗杯內放滿, 用膠刮或匙羹將表面掃平。
9) 用 180 度焗爐, 放中層, 焗約 14-16 分鐘即成。
10) 出爐後, 立即在梳乎厘面篩上糖粉, 否則會迅速回縮,盡快食用, 軟滑美味又可口。
祝大家新年快樂! 2016年有美好新的開始!
