彈彈精靈球 (甜品)

PokeMon GO 手機網絡遊戲本年7月份開始，在開拓了既地區，大家瘋癲地已玩了多個月，對基本既紅白精靈球，一定不會陌生啦，我當然都有玩吓，雖然現在無咁狂熱，但中堅分子的，仍會在報料區搵巢穴及搵精靈出沒地圖，專程去各區公園及大街小巷，捕捉稀有小精靈，集齊糖等畢業，去打吓擂台，叔叔阿太最捧場，每日去捉精靈，好似返工咁勤力，雖然互不相識，傾起來似朋友咁投契；今次我會用啫喱層及椰汁層，玩吓彈彈精靈球做甜品吧！但脫模時不完美，用朱古力溶液塗上圓形及兩邊線條時，彈彈精靈球因太滑難黏貼，直線塗得又唔靚，原來做圓形精靈球都有點難度嘅，哈哈…試玩吓咁做，唔靚都算數啦。

紅色啫喱層:

啫喱粉 80g (紅色士多啤梨味)

魚膠粉 4g

熱水 200 ml

做法 : 

1. 啫喱粉加入4g魚膠粉，用 200 ml 熱水開勻攪溶，放涼，倒入圓形容器中，放入雪櫃雪到凝固 (大約雪 2-3 小時) 備用。

2. 脫模後，中間切開成為兩份，在底部中央挖走小半月形備用。

白色椰汁層材料：
椰漿 140g

淡忌廉 45g
魚膠粉 13g

砂糖 80g
清水 260g

椰汁層做法：

1. 清水加砂糖煮滾離火，加入魚膠粉攪至完全溶解。

2. 再加入椰漿及淡忌廉拌勻備用。

3. 拌勻漿料待涼後，倒進已凝固半形紅色啫喱層模中，冷藏至凝固。

4. 取出脫模，將黑朱古力坐溶，放入筆形唧筒，在球中間塗上圓形及兩邊線條，再冷藏至朱古力凝固，做成紅白既精靈球。

百香果朱古力慕絲蛋糕 (生日用)

百香果，俗稱熱情果，原產於巴西，產於美洲的熱帶及亞熱帶地區。因其果汁營養豐富，氣味特別芳香，散發出香蕉、菠蘿、檸檬、草莓、番桃、石榴等多種水果的濃郁香味而被稱為「百香果」，所以百香果的果汁常被用作香料，加在其他果汁中，近日見多賣，今次用佢試做酸酸甜甜夠香味既，百香果朱古力乳酪慕絲蛋糕作生日餅，亦在此恭祝幾位與我同月同日生日既親友，生日快樂，健康幸福。

朱古力 6 吋棉花蛋糕材料：
低筋粉 35g  (混合朱古力粉過篩 2次)
可可粉 20g
鮮奶 60g
植物油 40g
砂糖 50g
蛋黃 4 個
蛋白 4 隻
檸檬汁幾滴

做法：

1. 植物油加暖熱熄火，拌入過篩粉料，加入鮮奶，再加入蛋黃 4 個，全部拌勻成蛋黃糊 。

2. 蛋白 4 個，加入檸檬汁，砂糖分 3 次加入打至發泡起勾。

3. 將蛋黃糊，與蛋白霜拌勻，倒入模內。

4. 預熱焗爐 170 度, 蛋糕漿 '櫈' 幾吓才入爐。

5. 用 170 度先焗 10 分鐘，再轉 150-160 度焗 40至 45 分鐘，用牙籤試蛋糕體，牙籤如無粉漿可出爐，幾分鐘後便可脫模，橫切 2 片備用。

慕絲層材料：

淡忌廉 200g
糖粉 60g
乳酪 100g
牛奶 40g
百香果汁 70g  (百香果切開挖肉連籽榨汁) 約 6-8 個
魚膠粉 12g

慕絲層做法：

1. 製作百香果慕絲層最好選用活底模具，模具底下墊一張油紙或咭紙。

2. 提前濾出 70g 百香果汁備用，乳酪盆中分多次加入牛奶和百香果汁攪拌至順滑。

3. 加入隔水坐溶的魚膠粉攪拌勻。

4. 淡忌廉中加糖粉打到七成發起，能保持紋路的程度。

5. 將混合好的百香果糊分三次與打發的淡忌廉拌勻。

6. 模具中先放入第一片收細少許的蛋糕片，倒入一半量百香果慕絲糊，震模入雪櫃冷凍幾分鐘左右。

7. 取出在慕絲再放上第二片蛋糕片，繼續倒入慕絲液，搖動幾吓模，入雪櫃冷藏 1-2 小時後，取出做鏡面。

百香果鏡面材料及做法：

百香果汁 40g  (留起少許百香果籽作裝飾)
水 50g
砂糖 40g
魚膠粉 6g

百香果鏡面，蛋糕冷藏 1 小時後取出做，魚膠粉加 50g 水拌勻，隔水坐溶魚膠粉及砂糖，與百香果汁拌勻過篩，放涼後淋上蛋糕面，繼續入雪櫃冷藏約 1-2 小時，敷熱毛巾脫模，可在蛋糕面加上水果或其他作裝飾。