白與黑之戀人

日本既北海道 ，是我最喜歡既地方，係好舒適及浪漫，所以也去過兩次不同方向既地區玩，去北海道 多數人，都會買吓當地出名既〈白之戀人曲奇〉做手信，也去過做白之戀人既生產製作地參觀，外型係一所好漂亮既『白之戀人朱古力趣緻城』，香港某大公司內都有售白之戀人曲奇，但好貴噃，又想再食喎，不如自己搵資料試整吓啦，我做了兩款口味，係白與黑，現俾大家睇睇，我既第一次自家出品，都可以咁啦！

材料：方型約40件

無鹽牛油 90g  (室溫放軟)

糖霜 90g

低筋麵粉 110g

全蛋 1隻（拂勻）

雲呢拿香油少許

白朱古力 100g  (可加些淡忌廉)

黑朱古力 100g

做法：

1. 低筋麵粉篩過備用

2. 先打勻無鹽牛油，再加糖霜同打勻至軟滑忌廉狀，加入1/3蛋液打勻，再加 1/3蛋液打勻，再加餘下蛋液，繼續打勻，加入雲呢拿油拌勻後，加入低筋麪粉，直至完全拌勻成幼滑麵糊

3. 把方形膠片模放在不黏布上，將麵糊鋪上，用膠刮片抹平，抹去多餘的麵糊

4. 輕手取走方形膠片模，把它放進雪櫃約5分鐘 (有助保持完整方形)

5. 放入預熱焗爐 140℃，焗 8-10分鐘至金黃色

6. 白與黑朱古力各用微波爐加熱 1至2分鐘，至溶拌勻備用，或可隔熱水座溶備用

7. 放涼後用牛油刀或匙子將已溶白與黑朱古力醬，沾上各曲奇片上，再將另一片合上即可。



(這是在 Yahoo blog 的舊作)

一間有 Heart 的素食館

昨天約了兩位同一日生日既網友作生日聚會，她們想食素食自助餐喎，搵來搵去，終於搵到一間係其中一位食過贊好既『茹素食』素食館；我們三人都住九龍，專程去到灣仔，這一間店舖在地庫，裝修雅緻有點似去咗森林咁，木製椅桌有些甚至保留樹幹原型，而且餐具全都是啡色配青色的，牆上有字畫，十分古色古香，讓人有種清靜脫俗之感，不吃素的，也可以品茗茶，看看多款佛學經書，也是賞心樂事，坐位寬闊舒服呀。

這間食 "齋 Buffet"既素食館，地點位於：灣仔軒尼詩道 288 號英皇集團中心地庫，如不想食自助餐既，都可以散叫其他食品，自家弄的素餐，餸菜沒有味精，據知這裡的原食物材料都係由自家舖製成，呢度出名既仲有藥饍湯飲，各色各樣幾十款，一盆盆既食物款式多，任君選擇，服務員從廚房不斷帶來剛整好的食物給大家嘗試，捧著個托盆，每一轉是一款，入面放有好多小碟一件食物，逐枱問客人要唔要，我們逐樣試少許，係源源不絕推出，嘩…先推出既有試食，但我們有好多款式都飽到不能再試食了，只要求影張相就算啦。

中小企的素食館，老闆好用心經營，員工服務態度又好，係值得推介的一間好食館，我們偶然同老闆娘傾了幾句之後，原來好啱傾，傾了好耐，她說最初用了幾百萬元搞裝修舖位，及所有開支，因店舖沒有做宣傳，又在地庫不易睇到，平時及假日人流不太多，開舖四年仍是蝕本，若這樣下去，也許明年3月約滿便要結業了，談及中小企既難處，又要用心苦戰，之後講及個人抱負及人生道理，我們覺得這一間咁有 Heart 的素食館，用心製作各色各樣咁精緻食品，味道又好，服務員個個都好親切，非常難得，結束實在太可惜了，我們好有誠意幫她推薦多些朋友到來試食，及會幫佢聯絡一些介紹食館既報刊雜誌及機構，仲與老闆娘交換了電話，希望能幫到佢少少，吸引多點客路，可以繼續經營，如大家都有興趣試吓呢間有Heart 的，款式多元化又好味既『茹素食』素食館，盡快約埋親朋去試試啦！

(這是在 Yahoo blog 的舊作)

豬腳薑醋有得食

 

恭喜賀喜，好開心我既家族新添了成員啦，就是大哥添了孫仔，姪仔生了小龍 B仔，佢急不及待早了廿天已出來同大家見面，我升級做了姑婆喎，為食既我在 12朝，當然要去姪仔家中，食吓添丁薑醋啦，及與12天大既 BB 見吓面啦，六磅幾既小 B 仔如公仔般，表情多多真的太可愛呀，薑醋係我亞嫂煲既好好味，我帶了個大盒攞薑醋，呵呵…又食又拎，多開心滿足啊！

如未有親友添丁，又想自己試煲有得食嘅，我搵了以下既資料，介紹一吓煲豬腳薑醋既做法，畀大家玩吓又有得食啦！

自用少份量材料:

薑 1 斤

添丁甜醋 500g (約 3支) (可加黑糯米醋,薑醋比例係1：2)

雞蛋 (隨意)

豬腳 2 隻或豬手 1 隻

瓦煲一個

製法:

1. 薑洗淨刮去皮後風乾

2. 用刀拍扁裂薑,然後放入白鑊慢火把薑兩面炒乾

3. 薑放入瓦煲內,加入甜醋2支用慢火煲沸,約20分鐘熄火

4. 每幾天取出來煮滾薑醋,以免細箘及霉箘滋生,約煲半個月入味後

5. 豬腳斬件後洗淨,然後放入沸水煮 5分鐘後轉慢火煲大約 30分鐘後取出盛起,隔乾水份

6. 雞蛋恰熟後浸凍水,去殼備用

7. 把豬腳放入薑醋中,再加入一支甜醋,用慢火煲至豬腳淋,再加入雞蛋,浸約15分鐘,熄火

8. 浸幾日後,把豬腳薑煮翻滾,便可食用啦！

註：如添丁用份量按比例加大便可。煲薑醋可以縮短煲的時間,約煲1星期左右,薑醋要用瓦煲盛載,忌用鋁,銻,鐵鑊煲。

生B要幾時煲薑醋?約生前一個月,煲定薑同醋先,煲了嘅薑醋每隔六至七曰就要煲一煲滾,到派薑醋前幾天才加豬腳及蛋!

薑醋對產婦的好處：

產婦產後即時可以飲用薑醋。薑醋對產婦身體早日康復,尤其是對內生殖器官的復原極有幫助。薑醋有袪風散寒、活血去瘀、幫助子宮收縮的作用；豬腳含有大量鈣質,而薑醋可以將之軟化、有助產婦補充失去的鈣質。而雞蛋含有八種人體必需的氨基酸，多種礦物質和維他命等多種成分，對產婦身體補益大有好處呀！

(這是在 Yahoo blog 的舊作)