牛奶忌廉紅豆雪條

夏天到了，天氣開始悶熱，有用剩餘既紅豆在雪櫃，最好就係整食幾支雪條食吓，今次整呢款牛奶忌廉紅豆雪條，材料簡單易做又好味，自家製無任何添加劑，食用放心，冰凍可口又可趕走悶熱感覺，真不錯呀!

材料：約 6 支

牛奶 250g
淡忌廉 130g

紅豆 150g   (現成腍紅豆)
砂糖 45g
粟粉 12g

做法：
1. 先將牛奶 30g 加入粟粉中攪勻備用。

2. 餘下的牛奶、淡忌廉、砂糖混合後用中火煮滾。

3. 再倒入粟粉水拌勻，煮滾後熄火。

4. 加入紅豆拌勻，放涼後入模。

5. 放入冰格 4-6 小時至凝固。

6. 取出後，放入水中略浸一會，脫模即可食用。

班蘭及蝶豆花缽仔糕

黃及白糖缽仔糕由細食到大，上次已試做過黃糖多豆，今次再整就改變一吓，較為特別既口味，係用班蘭葉及蝶豆花做，顏色係好靚，班蘭葉榨汁係好芳香，蝶豆花焗成既花茶，有清清花香氣，含大量花青素對眼有益，哈…味道真的不錯喎，仲好好食添，Q 彈又不黐牙，亦不會太甜，我喜歡食豆多嘅，自己整既當然會加多點紅豆做啦，大家可郁手自己試做吓這兩款新口味既缽仔糕呀！

材料:  (約 6-10 個)

粘米粉 100g
澄麵粉 20g
木薯粉 10g  (泰國生粉)

砂糖 100g

紅豆 1 碗  (煮腍加入適量糖備用)

清水 125ml  (另外 300ml)

班蘭葉 4-5 塊

乾蝶豆花適量

做法:

1. 先將班蘭葉加水榨汁，隔渣，加入 50g 砂糖拌溶，水份共是 150ml。

2. 乾蝶豆花適量，加熱水焗成花茶，隔渣，加入 50g 砂糖拌溶，水份共是 150ml。

3. 粘米粉、澄麵粉、木薯粉三種粉一齊過篩，加入 125ml 水，攪拌至平滑無粉粒。

4. 將粉糊分成兩份，一份加入班蘭汁，一份加入蝶豆花茶，拌勻備用。

5. 鑊中加水煮滾，每個碗模裡面，要掃上少許食油。

6. 兩款粉糊倒入各碗模中，平均放入些少紅豆先，用猛火共蒸 20 至 22 分鐘，當蒸至 8 分鐘時，加入其餘的紅豆粒，再蒸多約 12 分鐘，完成了，放涼後用竹籤脫模。

小貼士:

A. 紅豆粒如一次放晒入去蒸，會沉落在底部，面就睇不見有紅豆，所以要分兩段時間加入啦。

B. 蒸熟後要放涼約半小時，才用竹籤拮起，否則會容易爛開。

C. 如用碗仔蒸，時間要加多數分鐘才能熟透。