去行街買嘢，見隻北海道富良野 3.7 牛奶做超特價，北海道 3.6 牛奶就試過，呢隻未試過，買盒來整個布甸都好喎!日本北海道出產既牛奶較普通牛奶味香濃幼滑，特別適合於製作牛奶布甸！又滑又好味既布甸，無難度，簡單易整，之前用普通鮮奶做過，現在試新野睇吓是否唔同先，一做再做，今次淨用牛奶，冇加入忌廉，想試真點佢既奶味，做既有原味，另有朱古力味，又有加入了芒果肉既，應更香更美味及豐富呀!
材料 :
北海道 3.7牛奶 1000ml
(1公升)
砂糖 100克 (約 8 湯匙)
魚膠粉 14克
凍滾水 5.5 湯匙
雲呢嗱香油隨意
做法：
1. 魚膠粉用凍滾水開勻，用熱水坐溶拌勻。(如用熱水開會結成一舊舊)
2. 牛奶和砂糖用小火煮熱，但不要煮滾，只須將砂糖煮溶便可，再加入雲呢嗱香油。
3. 砂糖溶化後熄火，倒入魚膠粉液拌勻。
4. 將茶隔過濾奶液，隔走多餘物質，倒入小樽仔或布甸杯內。
5. 如加朱古力味，三分一份量，可加入可可粉3克拌勻過濾，倒入布甸杯內。
6. 放入雪櫃下格，冷卻凝固約 6-7小時或過夜食用最好。
* 可隨個人喜好，進食前於布甸放上可可米，藍莓、草莓等不同鮮果，或製作不同口味的牛奶布甸。
