法國經典甜品 - 馬卡龍 (Macaroon)

法國經典甜品 - 馬卡龍 (Macaroon)，出面一粒馬卡龍點解賣得咁貴，原來自己做過就知道了，因成功率偏低呀，我買過少許試味，知道佢表面是要光滑，有一道靚靚既蕾絲裙邊，甜甜的要配合咖啡飲，那是法國人既絕配，睇過多次別人做既馬卡龍資料，都好想試整吓，但人人都話 (Macaroon) 係極難成功，可能要做十多次才成功既法式甜品，我無交任何學費去學，亦無名師指導過，單純在網上收集食譜資料，或睇吓書，我決定要向難度挑戰試一試，睇吓自己既實力及成績去到邊呀。

第一次做真的失敗了，面係破裂發得不好變了硬餅，第二次再去試，成績好了少許，見『馬小姐』像少女酥胸般的外皮，肯穿著了迷人的蕾絲裙子，開心到跳起了，但再焗已變燶了又失敗，過了一排再想要挑戰多一次，今次試用另外一個人既焗的方法，嘩！連自己都唔敢相信，第三次就可以做到這樣，今次都算是好成功啦！其實製作過程又不是太難，最難就難在調較爐既溫度啫，因家用焗爐細，較難控制火力呀！

材料: 約可做 3 cm (16-18個)

杏仁粉 50g

糖霜 48g

蛋白 35g  (蛋要先放室溫)

砂糖 40g

食用色素 2-3 滴  (可加入少許杏仁香油)

做法:

1. 杏仁粉和糖霜過篩，拌勻備用
2. 砂糖分3次加入蛋白，打至發泡（拉起有角）
3. 杏仁粉加入蛋白霜中，拌勻。
4. 加入食用顏色，或其他味粉做成不同味道，注意拌好的麵糊不能太稀，提起拌匙麵糊慢慢掉下就可以了。
5. 將杏仁糊放入唧袋，唧出適當約 3 cm 圓型在不沾布上，將杏仁糊糰左右搖晃使表面光滑，放置約 30分鐘讓表面結成一層乾膜。

6. 放入已預熱 180℃ 焗爐中，關去爐火，將爐門打開少許，待 6分鐘

7. 將爐門關上，爐溫降至 140℃ 焗6分鐘，直至出現裙邊，裙邊升高後，降溫至 120℃，焗 5分鐘

8. 再降溫至100℃ 焗 5分鐘，最後，關掉爐火用餘溫焗約 8分鐘完成

9. 取出，待涼後取下，唧上預先準備好既餡料，夾上兩片一樣大小既馬卡龍即可。

馬卡龍藍莓吉士餡料：

蛋黃 30g

砂糖 20g

牛奶 50g

無鹽牛油 100g

藍莓茸適量

做法:

蛋黃與糖拌勻，回爐煮稠，待涼後拌入牛油搞勻，加入藍莓茸搞勻，入雪櫃備用。

朱古力餡料：

黑朱古力 30g

淡忌廉 30g

做法:

將黑朱古力切碎，用中火煮熱忌廉至將滾，熄火後馬上倒入朱古力拌溶，放入雪櫃雪至凝固，但不要雪太耐，否則太實唧唔到，然後取出放入唧袋，唧在馬卡龍上便可。

註：餡料可隨自己喜愛而改變，每一個馬卡龍大小厚薄沒有規定，但一定要出現漂亮的蕾絲裙邊才算是合格，但千萬不要怕甜而減少糖既份量，這是一定不會成功啊！