又是自己出手做生日餅既時間啦，好多款式既蛋糕都已做過，今次有乜好搞作呢，做個簡簡單單既益力多草莓芝士乳酪凍餅算吧，此蛋糕乳酪味道略重，酸酸甜甜，芝士味不太濃，適合喜歡草莓乳酪既朋友，雖然材料、步驟感覺好多，但其實係十分容易，自奉或送俾親友都咁啱食呀！也祝賀同月同日出生既另外三位親友，祝大家生日快樂，健康幸福，生活每日都開心愉快。
材料：（6 吋餅模）
餅底：
瑪利餅碎 / 或消化餅碎 60g
無鹽牛油溶液 30g
芝士餡料：
忌廉芝士 120g (室溫放軟)
砂糖 35g
淡忌廉 90g
益力多 75g
原味乳酪 55g
草莓果茸 75g
魚膠粉 9g
凍滾水 15g (開魚膠粉用)
餅面:
益力多 1支 (100ml)
魚膠粉 5g
水 15g
做法：
1. 忌廉芝士要放室溫下放軟。
2. 先準備餅底，餅乾碎加入無鹽牛油溶液拌勻，倒入蛋糕模中，用湯匙按壓至攤平至均勻，放入雪櫃中備用。
3. 將魚膠粉加入 15g 凍水開勻後，隔熱水坐溶液備用。
4. 用電動打蛋器以中速打淡忌廉，打至 6 成（如軟峰狀態），放入雪櫃備用。
5. 用電動打蛋器以中速打忌廉芝士，加入砂糖，打至軟滑，然後倒入益力多和原味乳酪，再以低速打勻。
6. 草莓果茸，倒入芝士混合物中拌勻，再加入打起的淡忌廉，用刮刀輕輕拌勻。
7. 再將坐溶既魚膠溶液，加入混合物，輕輕快速地拌勻至順滑。
8. 將混合物倒入蛋糕模中，放入雪櫃冷藏 1-2 小時。
9. 芝士餡凝固後，取出做餅面，把魚膠粉加水，隔熱水坐溶，再加入益力多攪勻，倒入芝士餡面，然後再放回雪櫃冷藏凝固。
10. 取出可用熱毛巾圍住蛋糕模外，幫助脫模，餅面可加上水果或其他裝飾後，完成了。
