黑椒蜜味豬肉乾

自家製豬肉乾都做過幾次，自己焗豬肉乾，睇真唔難整噃，好耐已無整，閒聊再整吓先，豬肉乾既製法中，糖份係比較多，都不太健康呀，大家都要少食為妙，今次加了黑椒碎，味道更鮮美，咁又成功做到了，特別唔同，係好鮮啊，因為我係買新鮮豬肉整呀，您食過出爐新鮮豬肉整既豬肉乾未呢，自己都可試吓整呀！

 材料：

枚頭豬肉 500g 攪碎或自行剁碎 

調味料：

生抽 1 湯匙

砂糖 90g

蠔油 1 湯匙

玫瑰露酒 2 茶匙

鹽 1 茶匙

黑椒碎 1 茶匙

紅麴粉適量  (調色用可不加)

蜜糖 2 湯匙  (稀釋塗面) 

做法：

1) 將全部調味料加入枚頭攪碎豬肉內，用順一個方向攪拌至豬肉起膠成一團，放雪櫃雪約 60 分鐘。 

2) 預熱焗爐，將豬肉膠，放上不沾布或牛油紙上，再放一張牛油紙舖面，並壓成薄片，亦可做成長方型或心型，之後取走面的牛油紙，將豬肉膠放上焗盤上。

3) 放進焗爐中層用 180ºC 上下火，焗約 12 分鐘，將豬肉塊反轉再焗 12 分鐘至熟透。

4) 焗至上色，取出，每件肉件掃上用水稀釋的蜜糖，放入焗爐焗改用上火，約 2至 3 分鐘呈現肉乾顏色。 

5) 取出，反轉另一面，掃上蜜糖，再放入焗爐焗多 2 至 3 分鐘呈現肉乾顏色，放涼後完成，剪細可以食啦。

*不同焗爐爐火都會不同，時間不能作準確，要自己執生睇火，以免焗燶，放涼後肉乾的顏色會變深色一點，加些少紅麴粉顏色更鮮艷*