城門水塘 (白千層及主壩)

城門水塘始建於 1923年，1936 年水塘落成，時值英皇登基 25 年，故當時水塘曾改稱為銀禧水塘，現時在水塘主壩仍有一座石碑紀念相關歷史，大家應該對城門水塘都會好熟識。

跟指示沿路步行就可以環繞城門水塘一圈，我們展開的旅程，首先進入菠蘿壩自然教育徑，條路平緩易行，但要注意嘅係呢度有好多馬騮出沒，繼續行，就會轉上石屎路，再行多一陣就到達城門水塘好出名嘅白千層樹林啦！樹林入面風景開掦，微風輕輕吹過，好似置身於世外桃源，10 月時，連續有兩個熱帶風暴襲港，持續下雨令到城門水塘排洪，並出現滿溢狀況，附近的白千層也受到影響，城門水塘一大片白千層的底部被浸在水中，更在水面的反射下，倒影處處，出現「白千層天空之鏡」之美景！

白千層樹林都算大，呢度唔單止有一片好大嘅草地，仲有廣闊嘅湖畔，吸引釣魚人士前來垂釣，同時都吸引唔少新人在這裡拍婚紗相。如你喜歡這美景下可靜靜地坐上一日，或者喜歡影相打卡嘅人或拍友，白千層樹林都十分適合啊！

繼續行山徑係衛奕信徑第七段，只要跟住指示牌一直行便可。山徑多數都係平路，行到山徑尾便可以見到城門水塘主壩。水壩十分壯觀，聲響都非常澎拜。因連續幾個颱風帶來雨水，城門水塘滿載，上水塘鐵橋及水掣房，鐘形溢流口，多出的水從「大水碗」流走，排往下城門水塘。觀賞完氣勢磅礴嘅城門水壩，有點晚霞景色出現，就要離開啦，離開嘅途中會經過燒烤場，有洗手間、汽水機，有需要嘅話可以在此地區休息一下，水塘區途中不時經過溪澗和水道，聽著流水聲特別舒適寫意啊。

路程：約 9 公里
時間：3-4  小時
難度：1-2  星 **
交通：起點於荃灣兆和街乘坐 82 號小巴到達城門水塘總站落車