DIY 蜜味豬肉乾

以上係 29/4/2012整第一次,在 Yahoo blog 出過網誌了

下面係近日重新再做既心型及大塊長方型

在網上常睇到好多自家製豬肉乾資料，吓…唔係瓦，豬肉乾都自己焗，睇真d又唔難整噃，一於照人咁試吓整先，睇落原來豬肉乾既製法中，糖份係非常之多，一點都不健康呀，大家都要少食為妙，呵呵，咁又成功做到了，味道真的鮮美，特別唔同，係好鮮囉，因為我係買新鮮枚頭豬肉整呀，您食過出爐新鮮豬肉整既豬肉乾未呢，自己試吓整吧！

材料：

枚頭豬肉 400g (約10 兩) 攪碎或自行剁碎

調味料：

生抽 1 湯匙半

砂糖 80g

蜜糖 2 湯匙

魚露 1 湯匙

玫瑰露酒 2 茶匙

鹽 1/2 茶匙

可加黑椒碎 1/2茶匙

做法：

1) 將全部調味料加入枚頭攪碎豬肉內，用順一個方向攪拌至豬肉起膠成一團，放雪櫃雪約15分鐘。

2) 預熱焗爐，將適量小匙豬肉膠，放上不沾布或牛油紙上，將豬肉分成小份，放上焗盤，用保鮮紙舖面，並壓成圓形小薄片，亦可做成長方型或心型，之後取走保鮮紙。

3) 放進焗爐中層用150ºC，焗約15分鐘，將豬肉塊反轉再焗15分鐘至熟透。

4) 焗至上色，取出，每件肉件搽上用水稀釋的蜜糖，放入焗爐焗約2至3分鐘呈現肉乾顏色。

5) 取出，反轉另一面，搽上蜜糖，再放入焗爐焗多2至3分鐘呈現肉乾顏色，放涼後可以食啦。

*不同焗爐爐火都會不同，時間不能作準確，要自己執生睇火，以免焗燶，放涼後肉乾的顏色會變深色一點。*