(大澳景色)
好久無去大嶼山玩啦，有朋友及親戚來港，其實都會帶他們去行吓，寶蓮寺都去過好幾次，佛誕那天與朋友參加了梁家傑議員搞既，大嶼山『昂坪寶蓮寺』食齋及『大澳』遊，我地有兩架大旅遊巴，九點半齊齊向大嶼山出發，經過了個幾鐘，已到達天壇大佛既頂處，太好了，今次不用行兩百幾級既長樓梯，因為係浴佛節，即『釋迦牟尼佛』誕生的日子，所以係特別多遊客，我雖然無信任何教派，都是去湊湊熱鬧！
浴佛節期間，因有特備節目加插，有四川變面、少林寺功夫、小丑表演、多項雜技等等，所以要霸位等睇，係露天坐呀，當日嬌陽似火，由等開始至完成結束要成個鐘，尚算好睇，慘啦乾曬差點變了生曬人乾，雙手紅晒似紅燒豬手，好彩塊面搽了防曬及戴了帽，無變黑炭頭啫，在佛門清靜地，中午當然係食齋菜啦！
餐後逛逛昂坪市集 ，唔夠時間行呀，要坐車到下一站，係有東方威尼斯之稱既『大澳』，好耐無來，景色依然，有廿蚊既海上遊，大家影完相，就掛住購物及食啦，實在太多地道野食，我們買了糕點、燒魚類、飲羅漢果茶，因餐後不久，太飽連豆腐花都試唔到，下次要空肚去食餐飽啊！我買了小魚乾、蝦乾、蝦醬、紫貝天葵、杏仁餅及糕點等等！要坐番個幾鐘車回程啦，在車上還玩 IQ問答遊戲，我答中了，有獎品喎，雖然不是值錢既毛巾、香皂、消毒藥水，都幾開心嘅，輕鬆既一天又玩完啦，天氣太熱又曬了一日，返家後感覺都已經好攰啊！
(這是在 Yahoo blog 的舊作)
沒有留言:
發佈留言