迪士尼的比較

『香港迪士尼樂園 』，相信好多人都去觀賞玩過，但開了三年，我10月21號才去玩，何解咁遲才去呀？原因好簡單啫，你心中應會有答案嘛，香港的面積實在太細小，有好多遊樂玩意區都無，但收費又不是平，那是值得去遊覽嗎？等佢開多點玩意才去囉，除非有小朋友啦，我認識既人還有好多都未去過玩噃。

 能和外國的迪士尼比較嗎？『美國』那個我與家人在十多年前去『美加』旅行時已玩過，那次去到就跟隨著旅行團既領隊帶領住，因那天不是假日，佢話帶我地順序咁玩，所有野都差不多玩晒，俾我既印象係好多野玩，又刺激，所有卡通人物都俾我地差不多影得晒，地方大，人不太多，好舒適，『美國』既人都好喜歡玩這些樂園啊！

『日本東京迪士尼樂園』，我與家人每次去『日本』不論係『本洲』，『北海道 』或『九州』，都會一定要經『東京』，都去過好幾次，『東京迪士尼海洋』都去埋，何解每次都會再去呢？好簡單啫，係想睇佢地對那樂園既熱誠及愛護，氣氛十分好，『日本』人係一年會去好多次，熟識程度係去到極點，例如：有次我地坐堡壘內既車睇野，前面座位有個單身少女，竟然間連邊度有門幾時要開都知道，她用手勢作打開狀態，跟每個公仔都揮手打招呼，真係可愛，有媽媽帶小朋友去樂園只係當普通公園行啊，導遊跟小朋友傾談，媽媽帶你來『迪士尼』玩，你係咪好開心呢，小朋友苦著臉話，我這星期來了五次啦，有乜開心喎；『日本迪士尼』係自己獨立管理及運作，已脫離了『迪士尼公司』既控制，亦係最多盈利既一間，因他們極為熱愛玩那些遊戲既人，睇佢地真的好投入咁去玩啊！

『法國迪士尼』，因我去歐洲旅行時佢仲未開，那就無去過，但『法國』人愛好浪漫，不喜歡生孩子，只愛養狗仔，所以『法國』街頭上，有架好似電單車有條吸管在街上行走，導遊叫我們估架車要來做乜，原來係幫佢地既愛犬吸狗屎，佢地都無乜小朋友，又點會鍾意去迪士尼呀，所以虧蝕係必然，可能快要關門啦！

所以『香港迪士尼』，成日都要搞點新玩意，近《萬聖節》就要學『海洋公園』搞《黑色世界》，《大街詭異酒店》當然要睇啦，鬼魂冥頑不靈，於酒店房間及走廊間迴盪出沒，垂涎靈魂多多，每次一組約十人，我地在前面，後面一班女仔，驚到捉實我隻手，好似老友般，佢地既嘩然驚嚇叫聲，仲驚過見到扮鬼魂既人呀，如想挑戰膽量的你，快去闖闖吧！三點半《花車巡遊》，七點又有《夜光鬼魅巡遊》，都唔錯幾有趣，八點《放煙花》都幾多，又幾好睇嘅，雖然下午三點才入去，唔洗點排隊，都差不多玩晒，那天係星期二平日，又不是假期，比我想像中多了好多人，好似假期般咁熱鬧，可能真係有《萬聖節》既特別野搞作啦，『香港迪士尼』，如不是常搞搞新意，也不能維持得幾耐囉，如你們有小朋友的話，真係要幫襯多幾次喇，『香港迪士尼』一定要加油呀！



(這是在 Yahoo blog 的舊作)