DIY 蜜汁叉燒

成日要諗今晚食乜餸好呢？都係幾煩惱呀，前兩日買了兩個補血既紅菜頭，不如煲個紅菜頭、南瓜、粟米、紅蘿蔔、南北杏、瘦肉清潤甜美靚湯飲啦；肉既試焗吓叉燒都好噃，容易整又美味，是日定食有靚湯、油菜心、叉燒等，哈哈…好似出街食套餐咁喎，其實前一晚食既蒜蓉炒芥蘭、冬菇蒸多寶魚、蝦仁什豆菜甫炒蛋，清清哋既家常便飯，仲加好呀！

材料:

柳梅豬肉約 400g (或用梅頭肉)

調味料:

叉燒醬2湯匙、海鮮醬半湯匙、生抽1湯匙、老抽1湯匙、玫瑰露酒1湯匙、砂糖少許

掃面蜜汁：

蜜糖或麥芽糖 2 湯匙

水 1 湯匙

做法:

1.) 豬肉洗淨吸乾水份，加入調味料醃好，放入雪櫃醃三小時以上或過夜，待入味。

2.) 取出室溫解凍後，放入已預熱 200度的焗爐，焗 40分鐘(焗至20分時，將叉燒翻轉面)。

3.) 取出掃上蜜糖或麥芽糖水，再焗 3-5 分鐘，從焗爐取出，等待十多分鐘後，讓叉燒吸收肉汁，不要立刻切叉燒，這樣會令裏面的肉汁流失的，之後可切件上碟。

4.) 用醃叉燒既濃汁番熱，再淋上切好既叉燒上面，味道更濃郁啊！

(這是在 Yahoo blog 的舊作)