豬腳薑醋有得食

 

恭喜賀喜，好開心我既家族新添了成員啦，就是大哥添了孫仔，姪仔生了小龍 B仔，佢急不及待早了廿天已出來同大家見面，我升級做了姑婆喎，為食既我在 12朝，當然要去姪仔家中，食吓添丁薑醋啦，及與12天大既 BB 見吓面啦，六磅幾既小 B 仔如公仔般，表情多多真的太可愛呀，薑醋係我亞嫂煲既好好味，我帶了個大盒攞薑醋，呵呵…又食又拎，多開心滿足啊！

如未有親友添丁，又想自己試煲有得食嘅，我搵了以下既資料，介紹一吓煲豬腳薑醋既做法，畀大家玩吓又有得食啦！

自用少份量材料:

薑 1 斤

添丁甜醋 500g (約 3支) (可加黑糯米醋,薑醋比例係1：2)

雞蛋 (隨意)

豬腳 2 隻或豬手 1 隻

瓦煲一個

製法:

1. 薑洗淨刮去皮後風乾

2. 用刀拍扁裂薑,然後放入白鑊慢火把薑兩面炒乾

3. 薑放入瓦煲內,加入甜醋2支用慢火煲沸,約20分鐘熄火

4. 每幾天取出來煮滾薑醋,以免細箘及霉箘滋生,約煲半個月入味後

5. 豬腳斬件後洗淨,然後放入沸水煮 5分鐘後轉慢火煲大約 30分鐘後取出盛起,隔乾水份

6. 雞蛋恰熟後浸凍水,去殼備用

7. 把豬腳放入薑醋中,再加入一支甜醋,用慢火煲至豬腳淋,再加入雞蛋,浸約15分鐘,熄火

8. 浸幾日後,把豬腳薑煮翻滾,便可食用啦！

註：如添丁用份量按比例加大便可。煲薑醋可以縮短煲的時間,約煲1星期左右,薑醋要用瓦煲盛載,忌用鋁,銻,鐵鑊煲。

生B要幾時煲薑醋?約生前一個月,煲定薑同醋先,煲了嘅薑醋每隔六至七曰就要煲一煲滾,到派薑醋前幾天才加豬腳及蛋!

薑醋對產婦的好處：

產婦產後即時可以飲用薑醋。薑醋對產婦身體早日康復,尤其是對內生殖器官的復原極有幫助。薑醋有袪風散寒、活血去瘀、幫助子宮收縮的作用；豬腳含有大量鈣質,而薑醋可以將之軟化、有助產婦補充失去的鈣質。而雞蛋含有八種人體必需的氨基酸，多種礦物質和維他命等多種成分，對產婦身體補益大有好處呀！

(這是在 Yahoo blog 的舊作)