葡式蛋撻

葡撻，有時見到都想食吓，蛋撻自己以前都整過好成功，但葡撻係用酥皮噃，雖然水皮加油皮做出來係酥皮，我都識既，但整少量既就太麻煩及浪費時間，就買現成試吓算吧，整法同蛋撻差不多，食法就好唔同，今次做出來食係可以，但個樣就唔多靚仔，焦糖面太少，可能係糖份唔夠多啦，下次參考過其他人資料，改善了再試啦！

材料 (約8-9個) :

急凍即用酥皮:  1塊 (約200 g)

牛油溶液: 適量 (掃撻模用)

蛋漿汁料:

淡忌廉: 50g

鮮奶: 70g

砂糖: 25 g

蛋黃: 2隻

雲呢拿香油: 1/4茶匙

做法:

1) 將酥皮放室溫1小時後，搓至軟身，平均切成小塊，每塊面積應該比撻模大1.5cm。

2) 撻模掃上牛油溶液，酥皮平壓印圓形在撻模中推開至平均，用义在酥皮上刺孔。

3) 放入雪櫃雪約15分鐘。

4) 忌廉和鮮奶放入煲內煮至小滾，然後加入砂糖慢火煮溶，熄火。

5) 蛋黃打散，慢慢將它傾入煲內，最後加入雲呢拿香油一起拌勻，放涼拌勻後隔渣備用。

6) 預熱焗爐，200度15分鐘。

7) 將蛋漿倒入7成滿，放入焗爐底層，用200度焗12分鐘。

8) 取出改放中層，改用170度焗約8分鐘至撻面呈焦黃色即成。



(這是在 Yahoo blog 的舊作)

中山超值兩餐一天團

又有超抵為食遊玩團，本與三朋友仔跟團去中山玩，但有一位突然入院去唔到，團費話買一送一喎，即係58元兩個人齊齊去玩，仲要食足兩餐，真的有點不相信，另外每人加收服務費50蚊就可以，每人計埋晒都係收港紙79蚊，行程有五處，雖然多是購物點，但各人可以自由選擇買與不買既，我們只買了些少實用既用品呀。

友友話主要係為了食呀，淨係食佢兩餐都夠抵啦，咁又係噃，中午那餐仲係魚翅撈飯宴，晚餐係五味脆肉鯇魚宴，每人一原盅禾花雀燉湯，每餐都有八餸一湯，飯任食呀，餸菜又大碟味道也不錯，仲有水果添，好抵呀，團費咁平，真係唔知佢地點樣賺到錢呢？

中山雖然不太遠，但由福田來回，都差不多要五個多鐘，所以晨早要出發，玩完整日，返回到福田口岸，已經係晚上九點多了，返到家中十點幾，都已攰了。



(這是在 Yahoo blog 的舊作)

自家製脆皮燒肉

在網上看到好多朋友都自家製脆皮燒肉，搵了幾份資料參考過，見做法都幾簡單噃，心血來潮想試吓整，放假到街市肉檔，買了一塊新鮮豬腩肉泡製一下，出來既效果也不錯，皮脆卜卜肉汁也多，味道同出面買既都差不多，都幾好食，第一次整自己都算係滿意啊！

材料 :

連皮五花腩肉斤半至2斤

粗鹽適量

醃燒肉料 :

紹興酒 1/2 湯匙 (醃肉時先將酒塗上)

幼鹽 2茶匙

糖 1/8 茶匙

雞粉 1/4 茶匙

沙薑粉 1/4 茶匙

五香粉 1/8 茶匙

製法 :

1) 五花腩肉留皮，先用刀在表皮上刮去污穢物及毛，用水洗淨，再將五花腩放入滾水內煲大約 6-8分鐘至約五成熟，然後取出用凍水過冷河。

2) 五花腩待涼後抹乾水份，用豬插或針釘在表面刺鬆豬皮表面，(必須要多，要密，否則豬皮不會爆沙鬆脆) 之後要先將酒抹上，再將其他醃燒肉材料拌勻，平均抹上整塊腩肉。

3) 將五花腩吊起吹乾最少 4-5 小時，(我因家中冇吊鈎，所以只放在蒸架上風乾5小時以上)。

4) 用錫紙將五花腩肉包裹，只留下豬皮部份不用包，錫紙的高度要比五花腩肉的高度多高1吋，錫紙與腩肉中間不能有空隙，可在錫紙四邊用牙籤拮住固定。

5) 包裹好的腩肉，在腩肉皮上面放下約1吋厚的粗鹽，把鹽輕輕壓實，表皮每一處地方都要用鹽覆蓋及不要被錫紙遮住。

6) 將包好的五花腩小心地放入已預熱15 分鐘 (230度) 的焗爐內，先焗 50 分鐘。

7) 取出將腩肉表面的鹽取走，再將燒肉放回入焗爐內，用210 度烤 20-25 分鐘，烤至豬皮鬆脆，因各爐火不同，時間要自己執生。

8) 待燒肉稍涼後，可斬件上碟。

註:

(A) 要買到靚及滑的五花腩肉，要買近豬胸口部位有少許骨及半肥瘦的五花腩，否則，其他部位比較鞋口。

 (B) 買五花腩時，要店員盡量將豬肉切成正方形一點，不要切長形，否則，太薄好難將五花腩包裹至企身。

 (C) 用鹽焗的方法是令到豬皮表面水份全部蒸發，達至表皮鬆脆效果，所以，沒有被鹽覆蓋的地方表皮會較韌。



(這是在 Yahoo blog 的舊作)