我的穴位美容小寵兒

在網上終於搵到有穴位磁鍉針及按摩三叉捧平賣，因朋友及我都使用過，效果不錯，所以亦代朋友們一齊買了這兩款多支呀，磁鍉針大約一根手指長，很容易使用，只要在家裡乖乖地按著指示，用磁鍉針按摩面部及頸部穴位與淋巴，想瘦面去紋，皮膚靚靚就好 easy 啦！一星期 2 次效果已經十分明顯，磁鍉針在面部按摩，能增速面部新陳代謝，達致排毒的功效；穴位按摩三叉捧全身穴位及淋巴，如膀胱經、肝膽經絡等等都適合使用，用途好多多啊! 

中醫美容較注重內外整體〈將容顏與臟腑、經絡、氣血緊密連結〉，中藥內服、外敷、針灸、推拿、氣功及食療等，使精氣暢通，並且簡便易行、安全可靠，作用廣泛而持久。磁穴按摩之特性及優點，已超越目前所有傳統醫療器械手法．使用上既省力又安全。磁穴按摩所產生的平譜（近遠紅外線），具有放射能力吸收共振作用，可促進氣血循環，增加代謝功能，提升免疫系統，使人體內之正負極電離子排列重組，可獲得舒筋舌血的目的；加上經過摩擦產生的熱能後，便可達到消腫止痛及改善組織機能的治療效果。

四句好有用既穴位歌仔，跟住做全身舒服晒！

肚腹三里留，

腰背委中求，

頭項尋列缺，

面口合谷收！

(這是在 Yahoo blog 的舊作轉來)

紅莓、提子包

我其實也學過吓整麵包既基本功,但到現在才試整,是對整麵包無咁大興趣,同時整了一次起碼有十個八個,屋企人又少,唔食得咁多,價值無整蛋糕西甜點咁大,又無咁靚,但都要試試做嘅,否則會忘記晒囉,麵包粉糰其實都有多款制法呀,有中種、湯種、老麵發酵及直接發酵法等等,今次我是跟網友既簡易直接發酵法去試做,第一次既成績就麻麻地,唔夠鬆軟,下次我會再試做中種或湯種,聽講係會好些呀。
材料:

高筋粉 200g
依士 6g  
糖 60g  
鹽 1 g
牛油 20g
蛋1隻
水 80g
奶粉 4g
麵包改良劑 1g
提子乾及紅莓乾隨意
掃包面蛋水 (蛋黃一隻加一隻雞殼水再拌勻)

做法：

1) 將高筋粉放在枱作圓形,依士放在中央加入少許水拌勻,等依士發酵一會,再將其他材料拌入搞勻,之後就開始搓呀,搓到個圓形,之後用保鮮紙包住發酵 20分鐘
2) 之後拌入提子乾及紅莓乾再搓勻,就分割成8小粒,再發酵 20分鐘
3) 搓成豬仔形後,再鬆弛發酵約 20分鐘
4) 預熱焗爐170度 15分鐘,掃上蛋水在包面後,篩上糖霜,焗包包約15分鐘至金黃色便完成了。 

(這是在 Yahoo blog 的舊作)

香芒乳酪啫喱慕絲餅

8月10號係我老友記既生日，前幾日問佢生日想食咩啫，佢立即話想食我整既蛋糕呀，我問佢咁想食咩類型，佢話仲可自選添咩，我話如識做既就無問題囉，她就話唔要出面買飾面有cream 那隻，想食芒果慕絲蛋糕，那都可以嘅，昨晚放工飯後立即開工整，因我都無整過，所以我整了一式兩個，一個今日送俾她，全飾面都係生果做，用芒果砌玫瑰花及其他水果，希望佢喜歡啦，另外一個有cream既飾面是留與家人分享啊！當她收到蛋糕時係好開心，立即與囝囝影相留念，祝她青春常駐，身體健康，生日快樂！

 [6吋圓形甩底餅模一個]

餅底材料：

消化餅碎 70g

溶牛油 30g

芒果慕絲：

芒果乳酪 130g

淡忌廉 210g

芒果茸粒 70g  (加入芒果汁少許較有香味)

砂糖 30g

魚膠粉 25g

淋面芒果啫喱凍：

芒果啫喱粉 45g

魚膠粉 4g

水 160g

飾面水果：

芒果

藍莓

奇異果

士多啤梨

珍珠糖糖  (全部水果份量隨意)

[做法]

1. 用 6 吋甩底蛋糕模。

2. 餅碎加入溶牛油拌勻，倒入蛋糕模中壓平，先放入雪柜冷藏一小時。

3. 淡忌廉打至七成企身放回雪柜備用。

4. 芒果粒，加入少許水及砂糖拌勻。

5. 用小煲放入芒果茸加熱至60度，加入魚膠粉拌至完全溶解拌勻，座凍水冷卻。

6. 芒果茸放涼(20-30度)後，及芒果乳酪，加入已打起之淡忌廉內搞勻，倒入蛋榚模中拌勻，放入雪柜冷藏 2小時。

7. 預備淋面芒果啫喱果凍，水用小煲加熱，放入芒果啫喱粉拌溶，再加入魚膠粉拌溶，熄火待涼(可座冰水冷卻)。

8. 倒入淋面啫喱果凍液，放入雪柜冷藏至凝固(雪一晚係最好)。

9. 取出後脫模，面加入各款預先切好水果作裝飾，咁就完成啦。



(這是在 Yahoo blog 的舊作)

盛夏洋紫荊號及赤柱遊

 

 

前幾日星期天，又跟吹水同鄉會去一天遊，今次仲勁，共有11部車，每車有六十多人，因好抵玩每位只收50蚊，我約同多位朋友一起參加，今次既行程包括{赤柱遊、洋紫荊號船上食自助午餐、紅磡中華廚房及上環美味棧購物等}，雖然不是太多地方去，見赤柱都好多年無去，地方唔錯環境靚，行吓都好嘅，停泊在北角碼頭既洋紫荊號係有幾層高，每晚都在維港兩岸遊，一邊睇靚夜景及可享受自助晚餐，一樂也！我們係跟團隊食既自助午餐，當然係好一般啦，無咩海鮮及靚野食，但食得好飽飽嘅，以為隻船會遊維港兩岸，原來佢係唔開，只在岸邊，大家真的有點失望啊！去兩處購物點，大家都好有興趣買了好多，我和朋友們都大有幫襯，仲又食又拎，真係費解，本港一天遊，都要學去大陸咁，一定要帶去購物點交差呢？

以下介紹一吓赤柱『美利樓』既歷史，現時聳立於赤柱海旁、風格古雅獨特的『美利樓』，30年前原來是坐落於港島北的金鐘，為何它會老遠的走到了南區呢？

始建於1844年並於兩年後落成的美利樓，毗鄰綠草如茵的香港木球會，前臨優美海港景色，是香港開埠初期駐港英軍的軍官宿舍及俱樂部，屬於金鐘美利兵房的一部分，駐紮了200多名英國將士。大樓以1828至1830年間出任英國殖民地大臣的美利爵士命名，四周柱廊圍列，宏偉非凡，是中區最早期修建的維多利亞式建築之一。二戰時期香港淪陷後，美利樓成為日軍的憲兵司令部及日本軍事統帥部，大樓內改建了多間囚室及闢作刑場，據稱曾監禁及處決逾4000名抗日義士及軍人。戰後美利樓交還英軍管理，並開設了軍官餐廳。直至1961年將使用權交予港府，1975至1982年期間成為差餉物業估價署總部辦公室。

美利樓作為早期中區維多利亞城的殖民地標誌建築，於1978年已獲古物諮詢委員會評定為首批一級歷史建築。然而到了80年代初香港地產市道急速起飛，美利樓終敵不過中區土地需求的壓力，港府宣布拆卸美利樓並拍賣該段黃金地皮，結果由中國銀行以1億元投得，並建成現時樓高70層的中銀大廈。然而由於清拆美利樓遭到不少保育人士反對，港府承諾將這座百年古老大樓分成4000多份拆卸並逐一編碼，方便日後覓地重建。結果美利樓的組件存放在大潭水塘附近的政府倉庫長達15年之久，直至1988年房署落實發展赤柱馬坑村計劃，並預留海旁填海地重建美利樓，工程人員逐步將千多件花崗岩和古典石柱組件按編號裝嵌，最後蓋上仿照原大樓建成的拱形木製屋頂。屋頂的8支煙煙囪，則來自西營盤高街的前精神病院，大樓前面的旗杆則來自英軍的添馬艦，而前園的石柱則取自油麻地上海街已拆卸的舊唐樓。2000年赤柱美利樓重建完成，成為赤柱廣場建築群的一部分。現時大樓底層為香港海事博物館，其餘二、三樓則為商場和餐廳，毗鄰有一直存在的天后廟，如未去過既朋友，赤柱有靚靚景色及特色既赤柱大街，又係外國人遊客必到，係好值得去逛逛嘅。

 



(這是在 Yahoo blog 的舊作)