有日本九寨溝之稱 - 五色沼 (毘沙門沼係最大)
(有紅、藍、綠、蔚藍、寶綠五種顏色)
淘金館 之 歷史館和資料館
日光 - 東照宮 (世界文化遺產)
松島岸邊
坐海鷗號船遊松島
遠眺松島風光
二荒山神社 (勁多杉林)
櫻花祭典 (二荒山神社門前)
日本第一美溪 (嚴美溪)
嚴美溪上面
仙台青葉城遺跡外- 既神社
秋田縣 - 角館和風武士街 (櫻花滿開處處)
田澤湖 - 辰子姬像
東京 - 幕張 Outlet 購物城
東京 - 購物城
櫻花滿開 (好靚呀)
懷石料理
什錦拉麵 薄皮豬肉餃子 (自己搵食-好好味)
當我 1982 年第一次去《日本》這個有新舊文化共存既地方，已經愛上了，所以每隔一段時間，就會心思思想再去，以前去過既有《日本、本洲》兩次，《北海道 、東京》兩次，《九州、東京》一次，今次就去了《日本東北、松島、仙台、秋田》一共六次，《日本》咁大咁多新野，就算你去了二、三十次都未必玩得齊啦，哈哈！我希望再繼續去好多好多次呀！
今次係幫襯《東 X 遊》五天遊，見佢既行程唔錯，復活後又唔太貴六千多，計埋什費、服務費約七千幾啦！嘩！犀利喎，仲唔止早去晚返咁簡單添，係早一晚零時十二點半起飛，返港也是零時十二點半才到達，頭搭尾計變了七日，係咪好抵呢！
行程開始啦，晨吉咁早《日本》時間五點幾，已到達『羽田機場』，出車第一站行程去中部，世界文化遺產『日光 -東照宮 』，是德川幕府第一代將軍德川家康的靈墓，建於 1617 年，後由第三代將軍德川家光在 1636 年擴建，是《日本》近代建築史上既傑作，是『日光』旅遊既主要景點，《日本》人認為一生人中一定要去一次；繼而前往杉林多多既『二荒山神社』，這兩處景點，第一次去《日本》時已到過，記憶中廿幾年都好似無咩點變，今次剛遇上佢地每年一度既『櫻花祭』巡禮，好多花車，每架車都有不同特色，車前面一班壯男齊拉蠅，車上滿載一班年輕穿著和服女孩子，齊玩《日本》傳統樂器及唱歌，車後亦有一班壯男推車，好熱鬧及好難得我們能夠遇到啊。
《日本東北》有六個縣，分別係『福島、青森、宮城、秋田、岩手和山形縣』；搭了好長車程，終於到了『五色沼』啦，佢在『福島縣』有『日本九寨溝』之稱，是『裏盤梯火山』噴火形成的湖群總稱，湖水既顏色塊麗而富有變化，我們這次欣賞到其中既『毘沙門沼』，湖面波平如鏡，色彩有如渲染的畫一般，由美麗的五種顏色交織而成，再加上未溶雪既火山，周圍綠樹與繁花爭艷，現初夏還可輕舟暢遊，鯉魚群遊樂，真是有如仙境一般的美麗。
『淘金館』係《日本》最初黄金出產既地方，館有設施包括黄金歷史館和資料館，也可自費体驗淘金樂趣，不過我們無人試呀，唔通不喜歡黃金。
『松島』沿岸以及松島灣上有 260 個大小島嶼組成既總稱，『松島』的景色根據地點與季節産生各種變化，景色之優美堪稱《日本》三景之一，我們坐海鷗號遊覽島嶼時，有好多海鷗群跟住我地隻船飛，牠們係追食我們預先買定手中既卡樂 B 蝦條，眼睛係非常準確食到，個個都玩得好開心，大家已忘記係睇靚景為主啊。
『仙台青葉城』遺跡，係江戶時代初期以武將聞名《日本》全國的伊達政宗修築，現該城已成廢墟，剩下的只有年久生苔的石牆和重修復原的角望樓，不過城跡卻作為公園，在山上可遠眺全『仙台』既靚景色。『仙台』有青葉城美號之稱，城市設計提倡休閒及舒適，亦有中央一番街，猶如大阪既心齋橋，當然無佢咁長啦！
『秋田民俗村』這裡算得上是一個綜合的展覽館，場內有多個不同的展區，各有不同的主題特色；一樓是《日本》民間傳統的工藝展館，這裡展覽著各式不同的《日本》傳統工藝品，如木製的家具、漆器、銀器、染織物和陶藝品，為遊客展示著古時《日本》民間生活的藝術和智慧。
『角館和風武士街』人稱《小京都》的『角館』，因為這個小市鎮保存了許多《京都》古時風格的建築古蹟。武家屋敷原是本地河原田家的家宅，資料館是以房舍的米倉所改建，裡面陳設古代武士使用之武器、生活用具、古文書及家族婦女使用之化妝箱，『角館』這市鎮 19/4 - 5/5 正是櫻花節開始，櫻花樹處處滿開，本地人也相約親朋好友齊齊來觀賞櫻花，兩旁店鋪林立買各色各樣食品，非常熱鬧，街上兩旁滿是盛開既櫻花樹，我們各人當然好興奮不停取景拍照啦。
『田澤湖』是靠近『秋田縣』東部中心的破火山口湖，水深約為423.4公尺，為《日本》第一，水的透明度也居《日本》第二位。幾乎為圓形的『田澤湖』，配上琉璃色的湖水，四周綿延不斷，配上有雪既山脈，成為了當地特有的美景，湖泊旁有一個金色少女像《辰子姬》，畫面你可想像到一定好美啊。
『盛岡手造村』為了防止東北鄉土傳統工藝法的失傳，由『岩手縣』政府所建築的綜合工作坊，聚集各類工藝師傅於此作示範、指導及展示作品的地方，手工精巧包含鐵器、木頭公仔、染布、餅食各個有趣實用，精巧藝品好精緻，我地齊集都要學亞茂整吓燒餅，哈哈！仲要自己食翻佢喎。
『嚴美溪』因巨石切割溪水而產生令人驚奇的變化，看似小小的一條溪流，竟也有峽谷、瀑布，加上不少滿開既櫻花樹，景觀也因為兩岸的壯麗景色，所以贏得 『日本第一美溪』既美譽啊。東北行程已完成，就坐了兩個小時《新幹線子彈火車》返『東京』既『池袋』區自由活動行街購物。
到了最後一日，早上到《田崎真珠》店，係《日本》從人工育苗到幼貝成熟，凝結成了晶瑩閃爍，奇光異彩既珍珠，在《日本》非常出名，繼續去幕張 Outlet 購物城，內有眾多知名品牌，大家自由活動。下午到『銀座』區，是國際大都市行街購物既好地方；因『銀座』行過好幾次，有四個鐘自由，又無咩要買，我地自己就坐 J R火車去『新宿』歌舞伎町區行街，擁擠既小路上，有各式各樣的食店，還有各類新潮服裝店、名牌百貨公司，〈0101百貨〉已有幾座很大啦，在 24 號仲另外新開多一大座本館添，佢應係『新宿』區最巨無霸既百貨公司。
總結今次去玩，有田園風光，有山有水，有古蹟有現代，食用又唔錯，最開心興奮係睇到周圍都有勁多滿開既櫻花樹，因多次到過《日本》都係冬天去，所以未睇過櫻花，我能在有櫻花瓣飄散中露天風呂，浸溫泉數次，真係賞心樂事，現還十分回味啊，嘻嘻，唔知我幾時挑起條根又想再去《日本》呢！
(這是在 Yahoo blog 的舊作)
