過大海 - 澳門一天遊 (2023)

 

久違了既澳門，好耐無去啦，雖然去過都好幾次，13/7 又再去澳門遊玩，除了飲飲食食之外，還有一個重要項目要到既，梗係去氹仔有東方拉斯維加斯之稱既賭場渡假酒店群逛逛啦！

早上搭 8:30 飛航船抵達氹仔碼頭後，因行程唔啱路，無試搭較新只行走氹仔既輕鐵，即搵酒店免費發財車經西灣大橋，搭去市區新葡京落車，當然要入去行個圈先，隨即由大馬路行去必到既議事亭前地打吓卡，之後行去玫瑰聖母堂參觀，跟住上大三巴牌坊、大砲台山、及入博物館逛逛；大三巴附近有各手信店舖，好多不同食品試食呀！

中午跟住在大馬路，搭 11 號巴士去氹仔既官也街，官也街是澳門著名的手信及小食街，全長雖只有約 115 米，但已雲集有口碑的餐廳及手信店，更有著名既水蟹粥、榴槤雪糕、豬扒包、牛雜等等，全部都是遊客想試既小吃！

跟住行往有地道特色、屬「澳門八景」之一的龍環葡韻住宅式博物館。這座博物館由 5 幢葡萄牙式住宅改建而成，館內的舊式家居擺設，重現了澳門昔日土生葡人的生活場景及文化。隔鄰是龍環葡韻濕地，生態區裡，在長廊旁邊，有 3 間觀鳥屋、亦可賞荷塘景色，之前 6 月中荷花節就在濕地中展出，現仍有點荷花可觀賞到。再上大潭山瞭望台，可遠眺氹仔新舊城區景色及濕地，有斜行升降機上落方便好多。

跟住當然係行去氹仔各大名酒店賭場區，主力行既有威尼斯人、巴黎人、倫敦人、新濠影滙等等，新濠影匯的「8」字摩天輪，是全亞洲最高、全球唯一一座 8 字型摩天輪，因酒店區太大，只能走馬看花逛逛，入這幾間賭場睇睇，在倫敦人玩吓老虎機，我絕不是賭客，用二百蚊做本，哈哈...玩剩三蚊咋！因天氣太熱，行得太多地方，有點虛脫，好口渴及疲倦，好在各大賭場中都有免費飲品供應，太多酒店群行唔晒，黃昏走出室外影吓各酒店外圍，巴黎鐵塔、大笨鐘等等，可惜七點仍然未天黑，鐵塔雖然亮了燈，未能睇到佢最靚既時刻，因要趕搭免費車到氹仔港澳碼頭，搭 8:30 船返港，今次快速地在 12 小時一天遊澳門，與對上次行程差不多，話咁快又玩完了這次行程，拖著疲倦既身軀返港啦！

行程： 氹仔碼頭→新葡京→議事亭前地→玫瑰聖母堂→大三巴牌坊→大砲台山→博物館→官也街→龍環葡韻→葡韻濕地→大潭山→威尼斯人→倫敦人→巴黎人→新濠影滙→氹仔港澳碼頭