藍莓及抹茶 - 雪糕月餅

一年容易又中秋，傳統及冰皮月餅大家都會買些送禮或自用，我屋企無咩人有興趣食這些月餅，今年我又再做了兩款藍莓及抹茶口味既雪糕，將佢做了幾個雪糕月餅來應吓節啦!

藍莓雪糕材料: 淡忌廉 250g、藍莓蓉 100g、煉奶 100g

抹茶雪糕材料: 淡忌廉 250g、抹茶粉 2-3 茶匙、煉奶 150g

雪糕做法: 將淡忌廉打至 7 成起泡,加入煉奶,再加入藍莓蓉 (抹茶雪糕改加抹茶粉),充分拌勻,倒入容器後,放入冰格雪 2、3小時至硬身取出備用。

[脆皮雪糕批，雪糕月餅]

材料:黑朱古力粒 250-300g (約做6-8個模殼用)

（1）先將黑朱古力隔熱水坐溶至液體狀態

（2）然後倒入矽膠模內薄薄先塗一層做外殼

（3）放入冰箱雪幾分鐘,再塗一層做保險,免有位置冇朱古力,再入冰箱雪到硬身。

（4）將自己喜愛的雪糕口味,要軟化一點,倒入模中約九分滿,再雪,(今次我做了藍莓及抹茶味)。

（5）雪糕雪硬後,再塗一層薄朱古力漿封頂,掃平再放入冰格雪硬脫模即成。

備註: 在黑朱古力中,可加一茶匙菜油,會滑一點冇咁杰身,黑朱古力粒或磚,在烘焙店有售。

切雪糕月餅小貼士： 於冰格取出月餅放室温約5分鐘後才切;先將金屬刀浸熱水一會後抹乾,放在月餅上要切的地方,待表面朱古力溶了後就一刀切到底;若底部的朱古力很厚,可考慮將刀抽出再浸熱水後才切,這樣朱古力層會冇咁容易切碎。

黑椒蘑菇飯

某間食雞既快餐店，有隻蘑菇飯，相信大家都會食過啦，我都幾喜歡食架，以前那間 [哈迪斯] 既蘑菇飯是更好食呢，我早就想試做吓，聽講材料中要用到有隻火雞汁做，但香港很難買到，其實火雞汁在普通超市是買不到，有人買到火雞汁試做過，覺得做出來的色水很像 KFC 的蘑菇飯，味道卻是兩回事呀，KFC 的味道較辣及較多香料，我在網上搵到個這食譜，重點是材料簡單，在家簡易做得到，所以我決定跟這食譜做一次，滿足吓 DIY 蘑菇飯的慾望，試食過了，味道都唔錯架，得閒想食又可再整多幾次啊！

食譜份量材料 : 約配  2 至 3 碗白飯

罐頭蘑菇  140g

蒜蓉  1-2 茶匙

食油  1茶匙

牛油  10g

清雞湯  180ml

中筋粉  8g

蠔油  1 湯匙

老抽半茶匙

砂糖半茶匙

鹽少許

黑胡椒  1 茶匙

做法:

1. 蒜頭剁成蓉、罐頭蘑菇隔水切片備用，中火燒熱平底鑊，用 一 茶匙食油爆香蒜蓉，加入蘑菇片炒香後盛起。

2. 用廚房紙抹乾淨平底鑊，中小火加入牛油，融化後加入中筋粉拌勻。

3. 加入清雞湯、蠔油、砂糖及鹽拌勻，慢火繼續煮至杰身，撒上黑椒和蘑菇片炒勻，煮至自己喜歡的質感，熄火，上碟配上白飯可拌食。