鴛鴦蝴蝶酥 [經典法式甜點] Palmiers

蝴蝶酥是經典既法式甜點，脆口香甜，用來做小食，捧一杯熱茶或咖啡，睇吓書，或者跟朋友聊天時的佐食，是最好不過。不要被這個『法式甜點』名字嚇怕呀，以為是很難做的，在出名的曲奇店買這種曲奇，一般都要花上不少金錢，其實要在家中做這個法式甜品，極之簡單快捷及化算得多。只要買到急凍千層酥皮，家中有一個焗爐就可以了，可以配上多款口味，如朱古力、桂花、肉鬆等等一同製作，我今次就做了原味及朱古力味兩款，不妨一試啊！

 

份量: 約有 20 塊原味及 20 塊朱古力味

材料:

急凍即用酥皮 2 塊 (室溫放軟)
砂糖約 6 - 7 湯匙
牛油適量 (室溫放軟)

可可粉約 1 茶匙
蜜糖適量 (加少許水稀釋)

做法:

1. 準備一塊酥皮,放出來解凍等佢變軟後,放在不黏布上,輕輕掃點牛油,用篩平均在表面灑下一半糖,再輕按壓一吓。

2. 反轉再輕輕掃點牛油,灑另一半糖,這一面或可篩入可可粉。

3. 兩邊向內摺 1/4 ,不用太大力壓,輕輕摺便可再向內摺,留意中間要有空隙位。

4. 再摺,放入雪櫃普通格雪約 25-30 分鐘,等佢變硬一點,用170 度預熱焗爐。

5. 取出切開一件件,每件約 1/2 吋闊,兩面塗上少許牛油,放上不黏布焗盤上,把兩邊稍稍分開,焗後就似蝴蝶雙翼的形狀。

6. 入焗爐以 170度,共焗 20分鐘,先焗 12分鐘後取出,反轉再焗 8分鐘。

7. 取出,在表面掃上蜜糖,焗 2分鐘,反轉再掃抹蜜糖，再焗2分鐘完成了！

小貼士:

1) 焗盤最好用不黏布墊住,否則酥皮好難自動爆開,不要用錫紙,有些牛油紙都未必得

2) 最後加蜜糖除增加甜味,亦令賣相閃亮,靚一點

3) 焗完吹凍先放入盒,第2日更香脆





椰香抹茶紅豆糯米糍

 

糯米糍,係一款時常會食到既甜品,其實整都是好簡易既,哈,但我竟然未整過喎,上次做西米布甸剩餘好多紅豆蓉,拿拿淋搵樣野整埋佢,我揀了佢做糯米糍既餡料,自己做,材料當然要配得好味點,所以加入了椰漿,仲有好香既抹茶粉,紅豆配綠茶,係最佳既拍檔呀！

材料: 約 15 粒

糯米粉 150g

粘米粉 10g

抹茶粉 7g

砂糖 60g

橄欖油 1 湯匙

椰漿 200g

水 150g

紅豆蓉 180g

椰絲茸適量 (飾面用)

做法：

1) 糯米粉、粘米粉、抹茶粉拌勻，過篩備用

2) 椰漿、水、糖、油煮滾後，隨即沖入粉類內，拌勻成粉糰

3) 將粉糰放在碟上、隔水蒸20分鐘

4) 蒸好後，置枱面放涼，戴上膠手套將麵糰搓揉一會，麵糰分成15等份 (每份約36g)，包入紅豆餡料，然後滾滿椰絲茸即成

 P. S. 雪凍後吃是更美味呀！





焗西米紅豆布甸

呢排工作繁忙,聖誕新年都唔多得閒上 blog 更新及整吓野食,趁新曆年晚上有點空檔,在網上揀選了一款簡簡單單既紅豆西米布甸食譜,整來食吓,呢款甜品都幾適合聖誕新年食架,雖然簡單,但我以前未做過,是第一次焗,又幾成功及美味喎,在此祝大家 2015年,健康快樂,事事順利!

 

材料: (份量約 6杯)

西米 45g

吉士粉 2湯匙

牛奶 250 ml

花奶 50 ml

中雞蛋 1隻

砂糖 45g

牛油 20g

紅豆蓉適量

雲呢拿香油少許

做法:

1. 西米先用水浸 10分鐘後,放入煲加 2 碗水煮10分鐘,熄火焗 15分鐘,沖水瀝乾待用

2. 先用牛奶 150 ml,吉士粉,雞蛋全部攬拌

3. 另用牛奶 100 ml,花奶,砂糖,牛油,全部材料倒入煲內用中火煮滾,加入 (2),不停攪拌至杰身,再加入西米即熄火拌勻

4. 用少許牛油搽抹容器,先加入 1/3 西米漿,加入紅豆蓉在中間,再加入西米漿至杯子 8 成滿

5. 留少許蛋液,掃於杯面,預熱焗爐 180度,放中層焗約 15分鐘

6. 如未能上色,再放在上層,用上火繼續焗 5-8分鐘,至表面有金黃色,取出放置 20 分鐘後食用最佳