草莓乳果雪糕

( 石板街雪糕 )



 

夏天熱辣辣,都想食點冰凍既野,整雪糕又係時候啦,一個超易做的雪糕食譜,又不需要用生雞蛋,連新手都輕易做到呀；我見仲有忌廉盛餘,就用多半份料,做埋朱古力味,加入棉花糖,但冇果仁,就不算是石板街雪糕嘅,有兩種口味既雪糕可以慢慢食囉,呢款草莓乳果雪糕酸酸甜甜,又唔會滯,真是不錯呀！

材料:

草莓蓉 250毫升  (或現成草莓蓉)

淡忌廉 400毫升

煉奶 140毫升

要加深顏色  (可加入些少士多啤梨香粉)

做法:

1. 將淡忌廉打至 8 分發起

2. 加入煉奶,草莓蓉,全部要拌勻,放入盒

3. 放入冰箱約 45 分鐘至雪糕漿面有少許呈雪霜狀為合,取出,用叉子撥打至全盒鬆散,又再放回冰箱

4. 重覆要做 (3) 過程一兩次後,再放入冰箱雪多 5-6小時便完成取出,可加喜愛水果或其他伴食！

註: 食用前先放回室溫約 5 分鐘, 口感更佳呀

  

又去西貢夜釣墨魚

 



 



踏入夏天6 月，去西貢釣墨魚活動，又成為大家的目標，班朋友話想去活動玩吓喎，佢地搵了專門搞釣墨魚既旅行社，平日去租船平點呀，就星期四啦，行程包括：遊艇+海鮮餐+釣墨魚用具+即釣即煮，黃昏五點集合食海鮮餐，跟住就出海啦，我幾年前都與朋友跟團去過一次，都係呢間旅行社搞嘅。

剛有位朋友生日，仲有蛋糕食呀，食完晚餐，六點幾集合在碼頭，上船出海等天黑 chok 墨魚啦，一共有 28人，船到達了可以有墨魚出沒既地方，船上安置幾枝用來照墨魚的大燈，因為墨魚會向有光的地方游過來，大家分派了魚絲八爪鈎，出動搵個靚位置，開始做釣魚郎，整個 chok 墨魚時間大概會有兩個多小時左右。

 

搞手想增加大家 chok 墨魚興趣，提出每人攞 10蚊出來作比賽獎品，過了10 分鍾左右，有人已釣到啦，海上都睇到有墨魚蹤影，亦見有一班班小魚仔游過，跟住亦有人 chok 到第二隻及第三隻，之後繼續有人 chok 到，有八個人就攻打四方城，我就冇乜心機 chok，只影吓相、玩吓電話、傾吓偈等，吹吓海風都幾舒服，我食白果呀，成晚合共釣得三十幾隻墨魚都算不差啦，差不多時間，船主即劏即炒墨魚，好香呀，每人都分倒有一隻食既，好美味噃，十點開船返西貢碼頭散隊，坐車歸家了，我去玩過兩次，今次成班識既朋友一齊去玩係幾開心嘅，我會否再去第三次，咁就唔知喇！

 

 

 



 

海鮮餐單：

仿古鹽焗雞

清蒸海上鮮

白灼游水蝦

清蒸鮮鮑魚

鮮魷魚炒時疏

秘製炒排骨

魚香茄子肉鬆

郊外油菜

絲苗白飯